काठमाडौं: नेपाली कांग्रेसको केन्द्रीय समिति बैठकमा विशेष महाधिवेशन आह्वान गर्ने प्रस्ताव उठेको छ।कांग्रेस केन्द्रीय सदस्य मधु आचार्यले आगामी मंसिर २४ गतेदेखि विशेष महाधिवेशनको प्रस्ताव गरेका हुन् ।
बैठकमा बोल्दै आचार्यले केन्द्रीय समितिबाटै विशेष महाधिवेशन आह्वान गर्नुपर्ने बताउँदै छोटो समयमा महाधिवेशन गरी आगामी निर्वाचनको तयारीमा लाग्नु अपरिहार्य रहेको उल्लेख गरिन्। उनले भने, “चुनावलाई पहिलो प्राथमिकता बनाएर जानु पर्ने अवस्था छ। विधानको दफा १७ (२) अनुसार मंसिर २४ गते, मंगलादेवी सिंहको जन्मजयन्तीको दिनदेखि विशेष महाधिवेशन आयोजना गरौं।”
कांग्रेसका बहुमत महाधिवेशन प्रतिनिधिले समेत विशेष महाधिवेशनको पक्षमा हस्ताक्षर संकलन गरिरहेका छन्। पार्टी अहिले विशेष महाधिवेशन पक्षधर र नियमित महाधिवेशन पक्षधर गरी दुई धारमा विभाजित बनेको छ।
नियमित महाधिवेशन पक्षधरहरू आगामी फागुन २१ गते हुने प्रतिनिधिसभा निर्वाचनपछि मात्र महाधिवेशन गर्नुपर्नेमा अडिएका छन्। तर विशेष महाधिवेशन पक्षधरहरू भने हालका सभापति शेरबहादुर देउवाको नेतृत्वमा चुनावमा जान नसकिने भन्दै तत्काल महाधिवेशन आवश्यक रहेको तर्क गर्दै आएका छन्।
