काठमाडौँ: सर्वोच्च अदालत आगामी मङ्सिर १ गतेदेखि पूर्णरूपमा सञ्चालनमा आउने भएको छ। भदौ २४ गतेको जेएनजी आन्दोलनका क्रममा भएको आगजनीका कारण अदालतले हालसम्म आंशिक रूपमा मात्रै सेवा प्रवाह गर्दै आएको थियो।
सर्वोच्च अदालतको बिहीबारको पूर्ण बैठकले आगजनी, ढुङ्गामुढा, तोडफोड र लुटपाटबाट बचेका मुद्दा तथा अवरुद्ध सेवाहरू नियमित रूपमा सञ्चालन गर्ने निर्णय गरेको छ।
अदालतको सूचना अनुसार, “मुद्दाका मिसिलहरू नष्ट हुनबाट बचेका छन्। पेसी तारेख तोकिएका मुद्दाहरू २०८२ मङ्सिर १ गतेपछि पूर्ववत् रुपमा तोकिएको मितिमा सुनुवाइ गरिनेछ। अन्य नयाँ पेसी नचढेका मुद्दाहरू पनि कानुन अनुसार सुनुवाइ गरिनेछ।”
बैठकले सेवा अवरुद्ध भएका सुरु मुद्दा, पुनरावेदन, दोहोर्याई पाउन निवेदन तथा पुनरवलोकन निवेदनसमेतका सबै मुद्दा र निवेदन दर्ता एवं सुनुवाइ गर्ने निर्णय गरेको छ।
