काठमाडौँ: राष्ट्रपति रामचन्द्र पौडेल कतारको राजधानी दोहामा सम्पन्न ‘सामाजिक विकासका लागि दोस्रो विश्व शिखर सम्मेलन’मा सहभागिता जनाएर आज अपराह्न स्वदेश फर्कँदै छन्।
राष्ट्रपति पौडेलले सम्मेलनको मुख्य सत्रलाई गत मंगलबार सम्बोधन गर्दै सामाजिक विकासका विषयमा नेपालका अनुभव र प्रतिबद्धता प्रस्तुत गरेका थिए।
त्यस्तै, उनले सम्मेलनकै क्रममा आयोजित “सामाजिक विकासका तीन स्तम्भको सुदृढीकरण—गरिबी निवारण, पूर्ण र उत्पादनशील रोजगारी तथा सबैका लागि मर्यादित काम र सामाजिक समावेशीकरण” विषयक उच्चस्तरीय गोलमेच बैठकमा समेत सम्बोधन गरेका थिए।
राष्ट्रपति पौडेलको उक्त भ्रमणले सामाजिक विकासका क्षेत्रमा नेपालको दृष्टिकोण र सक्रिय भूमिका अन्तर्राष्ट्रिय स्तरमा प्रस्तुत गर्न सहयोग पुगेको बताइएको छ।
