काठमाडौँ: प्रधानमन्त्री सुशीला कार्कीले दिगो विकासका लक्ष्य हासिल गर्न अपाङ्गता भएका व्यक्तिको सहभागी नेतृत्व र अपनत्वलाई प्राथमिकतामा राख्दै अपाङ्गता समावेशी विकास तथा शासन व्यवस्थाको रूपान्तरणतर्फ सरकार प्रतिवद्ध गरेकी छन् ।
अपाङ्गता भएका व्यक्तिहरूको अन्तर्राष्ट्रिय दिवसका अवसरमा बुधबार जारी सन्देशमा प्रधानमन्त्री कार्कीले शिक्षा, स्वास्थ्य, रोजगारी, सामाजिक सुरक्षा, पुनःस्थापनालगायतका क्षेत्रमा अपाङ्गता भएका व्यक्तिलाई सहज पहुँच उपलब्ध गराउन सरकार क्रियाशील रहेको उल्लेख गरिन्।
उनका अनुसार अपाङ्गताको प्रकार, गाम्भीर्य र आर्थिक–सामाजिक अवस्थाका आधारमा सेवा–सुविधामा प्राथमिकता प्रदान गर्दै सबैलाई सम्मानजनक र समतामूलक जीवन सुनिश्चित गर्ने नीति राज्यको मूल लक्ष्य हो।
प्रधानमन्त्रीले भौतिक, दृष्टिकोणजन्य, सञ्चार तथा कानुनी अवरोधसहित अपाङ्गता भएका व्यक्तिले सामना गर्दै आएका सबै प्रकारका बाधा हटाई पहुँचयुक्त र सम्मानजनक वातावरण निर्माण गर्नु आजको आवश्यकता भएको उल्लेख गरिन्।
उनले अपाङ्गता रोकथाम, पुनःस्थापना, रोजगारी तथा स्वरोजगारका कार्यक्रमलाई तीनवटै तहका सरकारको समन्वित प्रयासले अघि बढाए मात्र अपेक्षित उपलब्धि प्राप्त हुने विश्वास व्यक्त गरिन्।
सन्देशमा उनले नेपालको संविधान, अन्तर्राष्ट्रिय सन्धि–महासन्धि तथा विद्यमान कानुनहरूले अपाङ्गता भएका व्यक्तिको आर्थिक, सामाजिक, सांस्कृतिक र राजनीतिक अधिकारलाई व्यापक रूपमा संरक्षण गरेको स्मरण गराइन्।
प्रधानमन्त्री कार्कीले यस दिवसले अपाङ्गता क्षेत्रमा काम गर्दै आएका सरकारी तथा गैरसरकारी संस्था, सरोकारवाला निकाय र अभिभावकहरूलाई अझ प्रभावकारी रूपमा हक–अधिकार तथा सुरक्षाको पक्षमा काम गर्न प्रेरणा प्रदान गरोस् भन्ने शुभकामना व्यक्त गरिन्।
