मन्थली: अरनिको राजमार्गको सूर्यविनायक–धुलिखेल खण्डअन्तर्गत पलुबजार क्षेत्रमा रोकिएको सडक स्तरोन्नति कार्य पुनः सुरु भएको छ।
साँगा–धुलिखेल सडक विस्तारका क्रममा पुलबजार क्षेत्रस्थित मध्यविन्दुमा सडक छेउका जग्गाधनीले अवरोध गरेपछि डेढ वर्षदेखि काम रोकिएको थियो। अब अवरोध हटेपछि आयोजनाले पुनः निर्माण अघि बढाएको हो।
सूर्यविनायक–धुलिखेल सडक आयोजनाका प्रमुख विजयकुमार महतोका अनुसार साँगा–धुलिखेल खण्डमा हालसम्म ६० प्रतिशत र सूर्यविनायक–साँगा खण्डमा ४५ प्रतिशत काम सम्पन्न भइसकेको छ। सो क्षेत्रमा केही स्थानका छ वटा घर भत्काउने कार्य बाँकी रहेको समेत उनले बताए।
