काठमाडौँ: राष्ट्रपति रामचन्द्र पौडेलले आगामी फागुन २१ गते हुने प्रतिनिधिसभा सदस्य निर्वाचनलाई मानव–अधिकारमैत्री बनाउँदै लोकतान्त्रिक व्यवस्थाको सुदृढीकरणमा सबैले सकारात्मक भूमिका निर्वाह गर्नुपर्ने बताएका छन्।
७७औँ अन्तर्राष्ट्रिय मानव अधिकार दिवसका अवसरमा शुभकामना सन्देश जारी गर्दै राष्ट्रपति पौडेलले युवापुस्ताको आन्दोलनपछिको राजनीतिक परिवर्तलाई देश–विदेशले गहिरो चासोका साथ हेरिरहेको उल्लेख गर्दै वर्तमान परिस्थितिलाई सामान्यीकरण गर्न सरकार, राजनीतिक दल, नागरिक समाज, युवाअभियन्ता तथा सर्वसाधारणको साझा र रचनात्मक भूमिका अनिवार्य भएको बताए।
सन्देशमा संविधानले व्यवस्था गरेका मौलिक हकको प्रभावकारी कार्यान्वयनमा अझ सक्रिय हुन राज्य संयन्त्रले विशेष ध्यान दिनुपर्नेमा जोड दिइएको छ। मानवले सम्मानका साथ बाँच्न पाउने आधार नै मानव अधिकार भएकाले विश्वभर मानव अधिकार दिवस उच्च महत्त्वका साथ मनाइने उल्लेख गर्दै राष्ट्रपति पौडेलले नेपालले पनि विश्वव्यापी घोषणापत्रका सिद्धान्त अवलम्बन गर्दै स्वतन्त्रता, समानता र न्यायलाई सुदृढ बनाउँदै आएको बताए।
नेपाल विभिन्न मानव अधिकारसम्बन्धी अन्तर्राष्ट्रिय सन्धि–सम्झौताहरूको पक्षराष्ट्र भएकाले मानव अधिकारको सम्मान, संरक्षण र संवर्द्धनमा राज्य सधैं प्रतिबद्ध रहेको उल्लेख गर्दै उनले संघीय, प्रादेशिक तथा स्थानीय सरकार, सामाजिक संस्था, सञ्चारमाध्यम र निजी क्षेत्रको सक्रिय भूमिकाले जोखिममा रहेका समूहलाई हक–अधिकार र न्यायको अनुभूति गराउन महत्वपूर्ण योगदान पुर्याउने विश्वास व्यक्त गरे।
राष्ट्रपतिका अनुसार व्यक्तिगत स्वतन्त्रता र लोकतान्त्रिक शासनप्रणालीलाई सार्थक बनाउने मानव अधिकारको महत्वपूर्ण आधार आर्थिक, सामाजिक तथा सांस्कृतिक अधिकारको सुनिश्चितता हो।
