काठमाडौँ: सरकार र जेनजी संयुक्त जनआन्दोलनका अभियन्ताबीच हुन लागेको सम्झौतापत्रको मसौदा तयार गर्ने कार्य अन्तिम चरणमा पुगेको छ। प्रधानमन्त्री सुशीला कार्कीको निर्देशनअनुसार जारी द्विपक्षीय परामर्शपछि सम्झौतापत्रको खाका लगभग पूरा भएको बताइएको छ।
सरकारका प्रवक्ता तथा सञ्चार–सूचना प्रविधिमन्त्री जगदीश खरेलका अनुसार सरकारका प्रतिनिधि र जेनजी पक्षबीच भएको छलफलमा अधिकांश विषयमा सहमति बनिसकेको छ। “अब केही प्राविधिक शब्दावली मिलाउन बाँकी छ,” मन्त्री खरेलले बताए। सबै विषय टुंगो लगाइसकेपछि सम्झौतामा औपचारिक रूपमा हस्ताक्षर गरिनेछ।
त्यसैगरी जेनजी आन्दोलनका अगुवा सुदन गुरुङले मंगलबार सिंहदरबारमा प्रधानमन्त्री कार्कीलाई भेट गरी सम्झौता प्रक्रियाको प्रगतिबारे जानकारी लिएका छन्। भेटमा उनले आन्दोलनलाई वैधता दिने गरी चाँडो निष्कर्षमा पुग्न आग्रह गर्दै सम्झौतापत्र राष्ट्रपतिसमक्ष हस्ताक्षर गरिनुपर्ने माग प्रस्तुत गरेका थिए।
गुरुङले आन्दोलनमा सहभागी भएका कारण केही युवाहरू प्रहरीद्वारा पक्राउ परिरहेको, धरौटी तिर्न नसकेर पुर्पक्षका लागि थुनामा बस्नुपरेको गुनासो पनि प्रधानमन्त्रीसमक्ष राखेका थिए।
