काठमाडौँ : राष्ट्रपति रामचन्द्र पौडेलले देशमा देखिएका समस्याको समाधानका लागि आगामी प्रतिनिधि सभा सदस्य निर्वाचन नै सबैभन्दा प्रभावकारी लोकतान्त्रिक उपाय भएको बताएका छन्। सोमबार टुँडिखेलमा काठमाडौँ महानगरपालिकाको महानगर दिवसका अवसरमा आयोजित कार्यक्रममा बोल्दै उनले जनताको अभिमत लिनु लोकतन्त्रको उच्चतम अभ्यास भएको उल्लेख गरे।
राष्ट्रपति पौडेलले युवा पुस्ताले चाहेको परिवर्तनलाई व्यवहारमा उतार्न आगामी २१ फागुनमा हुन गइरहेको प्रतिनिधि सभा सदस्य निर्वाचन महत्वपूर्ण अवसर भएको बताए। उनले निर्वाचनलाई सफल बनाएर सामाजिक न्याय र सुशासनमार्फत समृद्ध नेपाल निर्माणको अभियानमा सबै सहभागी हुन आह्वान गरे।
देशले विभिन्न चुनौतीहरू सामना गरिरहेको उल्लेख गर्दै उनले परिवर्तनको चाहनालाई साकार पार्न प्रतिनिधि सभा निर्वाचनमा सहभागिता अपरिहार्य रहेको बताए। सामाजिक न्यायसहितको सुशासनबाट समृद्ध राष्ट्र निर्माण गर्न युवाको सक्रिय भूमिका आवश्यक रहेको उनको भनाइ थियो।
उनले इतिहासबाट सिकेर वर्तमानको आवश्यकता सम्बोधन गर्दै भावी पुस्तालाई समृद्ध नेपाल हस्तान्तरण गर्ने जिम्मेवारी वर्तमान पुस्ताको काँधमा रहेको बताए। यस जिम्मेवारी पूरा गर्न नवीन सोच, योजना, दृढ अठोट र नैतिकवान नेतृत्व आवश्यक रहेको उनले स्पष्ट पारे।
राष्ट्रपति पौडेलले काठमाडौँ महानगरपालिकाले शहरी व्यवस्थापन, नदी तथा जल प्रणाली संरक्षण, हरियाली प्रवर्द्धन, प्राकृतिक तथा सांस्कृतिक सम्पदाको संरक्षण र एकीकृत सहरी विकासका क्षेत्रमा उदाहरणीय कार्य गरेको भन्दै प्रशंसा पनि गरे।
