काठमाडौँ: नेपाली कांग्रेस का महामन्त्री गगन थापा ले नियमित महाधिवेशन रोक्ने प्रयास भए विशेष महाधिवेशन आयोजना गरिने चेतावनी दिएका छन्। सोमबार काठमाडौँ क्षेत्र नम्बर ४ का मतदातालाई सम्बोधन गर्दै उनले महाधिवेशन अवरुद्ध गरिए देशभरका कांग्रेस कार्यकर्ता सहभागी भएर विशेष महाधिवेशन गरिने बताएका हुन्।
महामन्त्री थापाले महाधिवेशन नगरी पार्टी निर्वाचनमा जान नसकिने स्पष्ट पारे। उनले भने, “नियतवश महाधिवेशन अवरुद्ध गरियो भने देशभरका कार्यकर्ता आएर विशेष महाधिवेशन हुन्छ र त्यसले स्पष्ट निष्कर्ष निकाल्छ।”
आफू १५औँ महाधिवेशनमा पार्टी सभापतिको उम्मेदवार रहेको उल्लेख गर्दै उनले सबैको सहयोगको अपेक्षा गरेको बताए। उनका अनुसार महाधिवेशन आन्तरिक प्रक्रिया मात्र नभई पार्टीको नेतृत्व र संरचना दुवैलाई नयाँ बनाउने महत्वपूर्ण अवसर हो।
थापाले यसपटकको महाधिवेशन पहिलो चरणमै टुंग्याउने गरी सहयोग गर्न आग्रह गर्दै नेपाललाई कुशासन र भ्रष्टाचारबाट मुक्त गराउन कांग्रेस अग्रसर हुनुपर्नेमा जोड दिए।
उनले अहिलेसम्म भएका गल्तीप्रति सबैले क्षमा माग्नुपर्ने धारणा व्यक्त गर्दै भदौ २३ गते भएको हिंसात्मक घटनाको सम्पूर्ण जिम्मेवारी तत्कालीन सरकार र प्रधानमन्त्रीले लिनुपर्ने बताए।
