मन्थलीका ६५ विद्यालयको एक स्वर : ‘शिक्षामा बिजुली निःशुल्क गरिदिनुस्

रामेछाप, मन्थली ।
मन्थली नगरपालिकाभित्रका सामुदायिक विद्यालयहरूले ऊर्जा, जलस्रोत तथा सिँचाइ मन्त्री कुलमान घिसिङसँग विद्युत महसुल निःशुल्क गरिदिन माग गरेका छन्।
मन्त्री घिसिङ सहभागी एक कार्यक्रममा मन्थली नगरपालिकाका ६५ वटा सामुदायिक विद्यालयका प्रधानाध्यापकहरूले हस्ताक्षरसहितको मागपत्र बुझाएका हुन्।
प्रधानाध्यापकहरूले बुझाएको मागपत्रमा सामुदायिक विद्यालयको सञ्चालन तथा व्यवस्थापन शीर्षकमा न्यून बजेट विनियोजन हुने गरेको उल्लेख गरिएको छ। शिक्षालाई सूचना तथा सञ्चार प्रविधिसँग जोड्दै गुणस्तरीय शिक्षाको पहुँच विस्तार गर्न विद्युतको खपत बढ्दै गएको भए पनि विद्यालयसँग विद्युत महसुल भुक्तानी गर्ने पर्याप्त स्रोत नभएकाले निःशुल्क गरिदिन माग गरिएको जनाइएको छ।
शिक्षक भिम नेपालीका अनुसार प्रविधिमैत्री शिक्षण सिकाइलाई निरन्तरता दिन विद्युत अपरिहार्य बनेको छ। “विद्युतको खर्चले विद्यालयको सीमित बजेटमा थप भार परेको छ,” उनले भने।
मागपत्र बुझ्दै मन्त्री घिसिङले सामुदायिक विद्यालयहरूले भोगिरहेको समस्या र मर्काका विषयमा सम्बन्धित निकायसँग आवश्यक छलफल गर्ने प्रतिबद्धता व्यक्त गरेका छन्