काठमाडौँ: नेपाली कांग्रेस का नेता डा। शेखर कोइराला ले आगामी फागुनमा हुने निर्वाचनमा सहभागी हुन कांग्रेस तयार रहेको स्पष्ट गरेका छन्। सन्त नेता कृष्णप्रसाद भट्टराई को १०२औँ जन्मजयन्तीको अवसरमा ‘कृष्णप्रसाद भट्टराई केन्द्र’द्वारा आयोजित कार्यक्रममा बोल्दै उनले शान्ति–सुरक्षाको पूर्ण प्रत्याभूति भए कांग्रेसलाई निर्वाचनमा जान कुनै आपत्ति नरहेको बताए।
नेता कोइरालाले निर्वाचनका लागि अनुकूल वातावरण आवश्यक रहेको उल्लेख गर्दै हालको शान्ति–सुरक्षाको अवस्था चिन्ताजनक रहेको धारणा व्यक्त गरे। “कांग्रेस चुनावमा जान तयार छ, तर शान्ति–सुरक्षाको सुनिश्चितता हुनुपर्छ। हजारौँ कैदीबन्दी कारागार बाहिर छन् र सयौँ प्रहरीका हातहतियार लुटिएका छन्। चुनावको नाममा धाँधली गरेर जित्ने छुट कसैलाई छैन। प्रहरीको मनोबल उच्च बनाउन जरुरी छ,” उनले भने।
निर्वाचन सम्पन्न गरी मुलुकलाई विकास र समृद्धिको दिशामा अघि बढाउनुपर्ने आवश्यकता औँल्याउँदै उनले देश हाल जटिल अवस्थाबाट गुज्रिरहेको बताए। पार्टीको केन्द्रीय कार्यसमितिको निर्णय ढिलो आउनु र क्रियाशील सदस्यताको फाराम गाउँगाउँसम्म समयमै नपुग्नुका कारण महाधिवेशन केही ढिलो हुन सक्ने सम्भावना रहेको पनि उनले उल्लेख गरे।
राष्ट्रियता कमजोर बन्दा गत भदौ २४ गतेको अवस्था सिर्जना भएको दाबी गर्दै नेता कोइरालाले राजनीतिक स्थिरतालाई वर्तमान समयको प्रमुख आवश्यकता भएको बताए।
कार्यक्रममा उनले कांग्रेसका संस्थापक नेता बीपी कोइराला, गणेशमान सिंह, कृष्णप्रसाद भट्टराई र सुवर्णशम्शेर राणालगायत नेताहरूको योगदानमाथि गहन अध्ययन र अनुसन्धान आवश्यक रहेको बताए। त्यसका लागि आफूले सक्दो सहयोग गर्ने प्रतिबद्धता व्यक्त गर्दै उनले सुशासन र भ्रष्टाचारको अन्त्यलाई सधैँ मुख्य मुद्दा बनाउँदै आएको स्मरण गराए। उनका अनुसार अहिलेको ‘जेन–जी’ पुस्ताले पनि यही अपेक्षा राखेको छ।
