काठमाडौँ: वर्तमान सरकारले आगामी प्रतिनिधिसभा निर्वाचनको अनुकूल वातावरण निर्माणका लागि सक्रियता बढाएको छ। आगामी फागुन २१ गते तय गरिएको निर्वाचनको तयारीका सन्दर्भमा सरकारले प्रमुख तीन दलका शीर्ष नेताहरूसँग सघन परामर्श सुरु गरेको हो।
यसै क्रममा आज सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलले नेपाली कांग्रेसका सभापति शेरबहादुर देउवासँग काठमाडौँको महाराजगञ्जस्थित निवासमा छलफल भईरहेको छ।
मन्त्री खरेलको सचिवालयका अनुसार उनले आजै नेपाल कम्युनिष्ट पार्टी (एमाले) का अध्यक्ष केपी शर्मा ओली र नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’सँग पनि छुट्टाछुट्टै भेटघाट तथा छलफल गर्ने कार्यक्रम तय भएको छ।
सरकारले निर्वाचनलाई शान्तिपूर्ण र विश्वसनीय ढंगले सम्पन्न गर्न राजनीतिक सहमति र सहकार्यलाई प्राथमिकतामा राखेर संवाद अघि बढाएको जनाएको छ।
