काठमाडौँ: तत्कालीन गृहमन्त्री तथा नेपाली कांग्रेसका नेता रमेश लेखकले नवयुवा आन्दोलनका क्रममा सुरक्षा निकायलाई आवश्यकता भन्दा बढी बल प्रयोग गर्न कुनै निर्देशन नदिएको स्पष्ट पारेका छन्।
भदौ २३ र २४ गते भएका घटनासम्बन्धी जाँचबुझ आयोगमा आज बयान दिँदै लेखकले गृहमन्त्रीको जिम्मेवारीमा रहँदा कसैको ज्यान नजाओस् र कुनै प्रकारको हताहत नहोस् भन्ने कुरामा आफू विशेष रूपमा सचेत रहेको बताए। उनका अनुसार सुरक्षा निकायलाई शान्ति–सुरक्षा समन्वयात्मक, जिम्मेवार र संयमित ढंगले व्यवस्थापन गर्न निर्देशन दिइएको थियो।
बयानका क्रममा लेखकले भने, “त्यस दिन गृहमन्त्रीको हैसियतमा मैले सुरक्षा निकायलाई दुईवटा कुरा स्पष्ट रूपमा भनेको थिएँ। पहिलो, कुनै पनि किसिमको हताहत नहोस् र मृत्युको अवस्था सिर्जना नहोस्स्। दोस्रो, समन्वयका साथ शान्ति–सुरक्षाको उचित व्यवस्था मिलाउनू।”
त्यसैगरी, उनले आन्दोलन नेतृत्वविहीन हुन सक्ने र बाह्य तत्वको घुसपैठको सम्भावना पनि रहेको भन्दै सुरक्षा निकायलाई सतर्क रहन निर्देशन दिएको जानकारी दिए। “यो कुनै राजनीतिक दलद्वारा आयोजित आन्दोलन नभएकाले नेतृत्व नहुन सक्छ र बाहिरबाट घुसपैठ हुन सक्ने सम्भावना रहन्छ। त्यसैले विशेष सावधानी अपनाउनू भन्ने मेरो निर्देशन थियो,” लेखकले स्पष्ट पार्नुभयो।
