काठमाडौं: प्रतिनिधिसभा निर्वाचन २०८२ अन्तर्गत राजनीतिक दलहरूले समानुपातिक निर्वाचन प्रणालीतर्फको बन्द सूची पेस गर्ने कार्यतालिकाका लागि सम्पूर्ण तयारी पूरा भएको निर्वाचन आयोगले जनाएको छ।
आयोगले सार्वजनिक गरेको निर्वाचन कार्यतालिकाअनुसार आज र भोलि राजनीतिक दलहरूले समानुपातिक निर्वाचन प्रणालीतर्फको बन्द सूची आयोगमा बुझाउनुपर्नेछ। पुस १३ र १४ गतेसम्म प्राप्त भएका बन्द सूचीको पुस १५ देखि २० गतेसम्म छानबिन गरिने आयोगले जनाएको छ।
बन्द सूचीको छानबिन पुस २० गतेसम्म सम्पन्न भएपछि पुस २१ देखि २७ गतेसम्म दलहरूलाई आवश्यक सुधार र मिलान गर्न समय दिइनेछ। त्यसपछि पुस २८ गतेदेखि माघ ३ गतेसम्म दलहरूले संशोधन गरी पेस गरेको बन्द सूची ठीक छ वा छैन भनी पुनः परीक्षण गरिनेछ। आयोगका अनुसार माघ ४ गते बन्द सूची सार्वजनिक गरिनेछ भने माघ २० गते अन्तिम सूची प्रकाशन हुने कार्यतालिका रहेको छ।
समानुपातिक निर्वाचन प्रणालीतर्फ सहभागी हुन हालसम्म १०० वटा राजनीतिक दल दर्ता भएका छन्, जसले ९३ वटा चुनाव चिह्नमार्फत निर्वाचनमा भाग लिनेछन्। समानुपातिक प्रणालीअन्तर्गत निर्वाचनमा सहभागी हुन दर्ता गरिएका राजनीतिक दलहरूले मात्र आज र भोलि बन्द सूचीमा समावेश उम्मेदवारको विवरण पेस गर्न पाउनेछन्।
