काठमाडौं: पूर्वप्रधानमन्त्री तथा नेकपा (एमाले) का अध्यक्ष केपी शर्मा ओलीको स्थानहद आज फुकुवा गरिएको छ। भदौ २३ र २४ गतेका घटनाको छानबिनका लागि गठन गरिएको जाँचबुझ आयोगको आजको बैठकले ओलीमाथि लगाइएको स्थानहद हटाउने निर्णय गरेको हो।
आयोगका प्रवक्ता विज्ञानराज शर्माका अनुसार असोज १२ गते आयोगले ओलीलाई विदेश यात्रा गर्न र अनुमतिविना काठमाडौँ उपत्यका छाड्न नपाउने गरी रोक लगाएको थियो। तर नवयुवा आन्दोलनका सन्दर्भमा तत्कालीन प्रधानमन्त्रीको हैसियतमा गरेका कामकारबाहीबारे आवश्यक सोधपुछ सम्पन्न भइसकेकाले अब उक्त प्रतिबन्धको औचित्य समाप्त भएको ठहर गर्दै फुकुवा गरिएको जनाइएको छ।
प्रवक्ता शर्माले जारी गरेको विज्ञप्तिमा सोधपुछको प्रक्रिया पूरा भइसकेकाले विदेश भ्रमण रोक्का तथा उपत्यका नछाड्ने निर्णय हटाइएको उल्लेख गरिएको छ।
यसैबीच, ओलीले हिजो राष्ट्रिय मानव अधिकार आयोग मा बयान दिएका थिए। त्यस्तै, उनले जाँचबुझ आयोगसमक्ष पनि लिखित ‘स्टेटमेन्ट’ बुझाएका छन्। आयोगका सदस्यहरू भक्तपुरको गुण्डुस्थित उहाँको निवासमा पुगेर उक्त लिखित बयान लिएका थिए।
पूर्वन्यायाधीश गौरीबहादुर कार्की को नेतृत्वमा रहेको उक्त आयोगले यसअघि तत्कालीन सरकारका केही मन्त्रीहरू, सुरक्षा निकायका प्रमुखहरूसहित विभिन्न सरोकारवालासँग बयान लिइसकेको छ।
