काठमाडौं: प्रधानमन्त्री सुशीला कार्की सँग आज थारू कल्याणकारिणी सभाको एक प्रतिनिधिमण्डलले भेटवार्ता गरेको छ।
प्रधानमन्त्री निवास बालुवाटारमा भएको भेटमा प्रतिनिधिमण्डलले प्रधानमन्त्री कार्कीलाई थारू राष्ट्रिय माघी महोत्सवमा सहभागी हुन औपचारिक निमन्त्रणा दिएको हो। मूल आयोजक समितिका संयोजक तथा थारू कल्याणकारिणी सभाका अध्यक्ष प्रेमीलाल चौधरीले माघ १ गते काठमाडौंको टुँडिखेलमा आयोजना हुने महोत्सवका लागि प्रधानमन्त्रीलाई निमन्त्रणापत्र हस्तान्तरण गरे।
भेटका क्रममा अध्यक्ष चौधरीले थारू समुदायका माग र मुद्दाहरू सम्बोधन गर्न आग्रह गर्दै संविधान जारी भएको एक दशक बितिसक्दा पनि निजामती सेवामा थारू समुदायको आरक्षण सुनिश्चित हुन नसकेको गुनासो व्यक्त गरे।
प्रधानमन्त्री कार्कीले संविधान र कानुनले सुनिश्चित गरिसकेका हक अधिकारको अभ्यास रोक्न नहुने स्पष्ट धारणा राखिन्। उनले भनिन, “संविधानले दिएको अधिकार कसले र किन रोकेको हो, यो कुरा मैले पनि बुझ्न सकिरहेको छैन। यस विषयमा म चिन्तित छु। संविधान र कानुनमा व्यवस्थित भइसकेका हकको प्रचलन अवरुद्ध हुनु हुँदैन।”
देश सबै समुदायको साझा फूलबारी भएकाले राज्य संरचनामा सबैको समान र उचित प्रतिनिधित्व आवश्यक रहेको प्रधानमन्त्री कार्कीले उल्लेख गरिन्। उनका अनुसार सबैको सहभागिताबाट भएको विकास मात्र दीगो र समावेशी हुन्छ।
थारू समुदायले प्रत्येक वर्ष माघे सङ्क्रान्तिका दिन परम्परागत रूपमा माघी पर्व मनाउँदै आएको छ।
