काठमाडौँ: नेपाल पत्रकार महासङ्घको टोलीले आज सञ्चार तथा सूचना प्रविधिमन्त्री डा। विक्रम तिमिल्सिनासँग भेटघाट गरेको छ।
सो अवसरमा सरकारी विज्ञापनसम्बन्धी सरकारको पछिल्लो नीतिबारे छलफल भएको थियो। महासङ्घकी अध्यक्ष निर्मला शर्माको नेतृत्वमा गएको टोलीले चैत १८ गते प्रधानमन्त्री तथा मन्त्रिपरिषद्को कार्यालयबाट जारी निर्देशनप्रति मन्त्री तिमिल्सिनाको ध्यानाकर्षण गराएको हो। उक्त निर्देशनमा सरकारी सूचना र विज्ञापन सरकारी सञ्चारमाध्यममार्फत मात्र प्रकाशन–प्रसारण गर्नुपर्ने व्यवस्था गरिएको छ।
भेटका क्रममा मन्त्री तिमिल्सिनाले सरकारी विज्ञापनको रकम दुरुपयोग हुने, श्रमजीवी पत्रकार प्रत्यक्ष रूपमा लाभान्वित हुन नसक्ने तथा बिचौलियाको प्रभाव बढ्दै गएको अवस्थालाई ध्यानमा राखेर यस्तो निर्णय गरिएको बताए। उनले श्रमजीवी पत्रकारको हकहितमा आफू सधैँ प्रतिबद्ध रहेको र जायज माग सम्बोधन गर्न पहल गर्ने विश्वास दिलाए।
यसैबीच, महासङ्घकी अध्यक्ष शर्माले सरकारको नयाँ विज्ञापन नीतिले समग्र सञ्चार क्षेत्रमै नकारात्मक प्रभाव पर्न सक्ने उल्लेख गर्दै पुनर्विचार गर्न आग्रह गरिन। सरकारका अनुसार भने सार्वजनिक खर्चमा मितव्ययिता कायम गर्न, विज्ञापन वितरणलाई पारदर्शी बनाउन तथा सरकारी सञ्चारमाध्यमको प्रवर्द्धन गर्न यस्तो नीति ल्याइएको हो।
