रामेछापको कवर्ड हल खेलाडीका लागि प्रदेश सरकारको उपहार : मन्त्री तामाङ

रामेछाप । बागमती प्रदेशका स्वास्थ्य तथा सामाजिक विकासमन्त्री गीरबहादुर तामाङले रामेछापमा निर्माण भइरहेको कवर्ड हल जिल्लाका खेलाडीका लागि प्रदेश सरकारको उपहार भएको बताएका छन्।
निर्माणाधीन कवर्ड हलको निरीक्षण गर्दै मन्त्री तामाङले रामेछापको कवर्ड हललाई देशभर चिनाउनुपर्ने बताए। उनले यो संरचना देशकै पहिलो रहेको र खेलाडीका लागि महत्वपूर्ण भएको भन्दै यसको संरक्षण र थप विकासमा प्रदेश सरकारको सहयोग रहने प्रतिबद्धता जनाए।
नागरिकले विकास खोज्नु स्वाभाविक हो। तर राज्यको आर्थिक अवस्था कति छ र त्यसलाई कसरी बढाउने भन्ने विषयमा नागरिकले पनि चासो दिन आवश्यक छ, मन्त्री तामाङले भने, “पहिला के भयो भन्ने कुरा छाडौँ, अब नयाँ तरिकाले अगाडि बढ्नुपर्छ।”
उनले कवर्ड हल निर्माण सम्पन्न भएपछि रामेछापलाई प्रदेश सरकारले थप उपहार दिने बताए। कवर्ड हल निर्माण हुँदैमा प्रदेश सरकार चुप नबस्ने भन्दै उनले घेराबार तथा पर्खाल निर्माणका लागि समेत प्रदेश सरकार तयार रहेको बताए।
“अबको दुई महिनाभित्र कवर्ड हल उद्घाटन गर्न पाउनुपर्छ। हामी उद्घाटनसँगै हस्तान्तरण गर्न आतुर छौँ,” मन्त्रीले जनाए ।
कवर्ड हलमा भलिबल, ब्याडमिन्टन र बास्केटबललगायतका खेल सञ्चालन गर्न सकिनेछ। यसले रामेछापका खेलाडीलाई प्रशिक्षण तथा प्रतियोगिता सञ्चालनका लागि सहज वातावरण निर्माण गर्ने अपेक्षा गरिएको छ।
स्वास्थ्य तथा सामाजिक विकास मन्त्रालयले नागरिकमुखी काम गर्ने उल्लेख गर्दै मन्त्री तामाङले नागरिकको हितमा काम गर्न आफू प्रतिबद्ध रहेको बताए।
कवर्ड हल निर्माणको जिम्मेवारी सुनकोसी गिरी जेबीले पाएको छ। हल निर्माणका लागि ६ करोड ५७ लाख ९२ हजार ८८० रुपैयाँ लागत रहेको छ।