राहतमा जुटे भद्रकुमारी बिधालयका विद्यार्थी

चितवन २६ भदौ । भोटेकोशी क्षेत्रमा आएको विनाशकारी बाढीले धेरै परिवारलाई विस्थापित बनाएको छ। कसैले आफन्त गुमाएका छन्, कसैले घरबार, त कसैले वर्षौंको मेहनतले जोडेको सम्पत्ति। विपद्को यो पीडामा देशका विभिन्न ठाउँबाट सहयोगका हातहरू जुटिरहेका बेला भरतपुर–५ स्थित भद्रकुमारी राष्ट्रिय आधारभूत विद्यालयका विद्यार्थीहरू पनि मानवीय सेवाको अभियानमा जोडिएका छन्।
विद्यालयको जुनियर रेडक्रस सर्कलमा आबद्ध विद्यार्थीहरूले बाढीपीडितका लागि १५ हजार २५० रुपैयाँ सहयोग रकम संकलन गरेका छन्। आफ्नो खाजा खर्च तथा आफूले सकेको स्रोतबाट रकम जुटाउँदै विद्यार्थीहरूले विपन्नमा परेका नागरिकप्रति ऐक्यबद्धता जनाएका हुन्।
सानै उमेरमा विद्यार्थीहरूले देखाएको यो सेवाभाव रकमको हिसाबमा मात्र सीमित छैन। पीडितको दुःखलाई महसुस गर्ने, समाजप्रति जिम्मेवार बन्ने र संकटमा परेकालाई सहयोग गर्ने संस्कार विकास गर्नु यसको ठूलो उपलब्धि हो।
विद्यालयका प्रधानाध्यापक राजेन्द्रप्रसाद चालिसेको मार्गदर्शन तथा जुनियर रेडक्रस शिक्षक नायक सरस्वती पौडेलको नेतृत्वमा सहयोग रकम संकलन गरिएको हो। अभियानमा विद्यार्थीहरूले उत्साहपूर्वक सहभागिता जनाएका थिए।
भद्रकुमारी राष्ट्रिय आधारभूत विद्यालय अध्ययन अध्यापनमा मात्र केन्द्रित विद्यालय होइन, विद्यार्थीलाई मानवीयता, सामाजिक उत्तरदायित्व र सेवाभावसँग जोड्ने अभ्यास गर्दै आएको विद्यालयका रूपमा पनि आफ्नो पहिचान बनाउँदै गएको छ। जुनियर रेडक्रसको माध्यमबाट विद्यार्थीलाई व्यवहारिक रूपमा सामाजिक सेवामा सहभागी गराउनु त्यसैको एउटा उदाहरण हो।
विद्यालयले विद्यार्थीलाई किताबी ज्ञानसँगै असल नागरिक बन्ने संस्कार दिनुपर्ने मान्यताअनुसार अभियान सञ्चालन गरेको जनाएको छ। विपद्का बेला सहयोग गर्नुपर्छ भन्ने कुरा कक्षाकोठामा पढाउनु र त्यसलाई व्यवहारमै उतार्नु फरक कुरा हो। भद्रकुमारीका विद्यार्थीहरूले भने व्यवहारबाटै यसको उदाहरण प्रस्तुत गरेका छन्।
१५ हजार २५० रुपैयाँ ठूलो रकम नहुन सक्छ। तर त्यो रकमभित्र जोडिएको विद्यार्थीको मेहनत, सहानुभूति र सेवाभाव ठूलो छ। आज उनीहरूले दिएको सानो सहयोगले भोलिका दिनमा समाजप्रति जिम्मेवार नागरिक बन्ने संस्कार निर्माण गर्न सक्छ।
यस अर्थमा भद्रकुमारीका जुनियर रेडक्रस विद्यार्थीको यो अभियान केवल बाढीपीडितलाई आर्थिक सहयोग होइन, ‘सहयोग गर्ने संस्कारले नै सभ्य र जिम्मेवार समाज निर्माण गर्छ’ भन्ने सन्देश दिने सफल विद्यालय अभ्यास पनि हो।