भोटेकोशी बाढीपीडितलाई केब्स स्कूलका शिक्षक र विद्यार्थीको आर्थिक सहयोग

रामेछाप । भोटेकोशी बाढीबाट प्रभावित बालबालिकाको सहयोगका लागि मन्थलीस्थित केब्स स्कूलका शिक्षक, कर्मचारी र विद्यार्थीले ८७ हजार ५ सय ७८ रुपैयाँ सहयोग गरेका छन्।
विद्यालयमा अध्ययनरत करिब ६ सय विद्यार्थीले स्वेच्छिक रूपमा संकलन गरेको ३८ हजार २ सय २२ रुपैयाँ, दानपेटिकाबाट ८ हजार १ सय ६१ रुपैयाँ तथा शिक्षक कर्मचारीले दुई दिनको तलबबाट ४१ हजार १ सय ९५ रुपैयाँ सहयोग गरेका हुन् ।
विद्यालयका शिक्षक माधव सयपत्री र रेस्मा श्रेष्ठलगायतको सहजीकरणमा संकलित रकम भाद्र २२ गते विद्यालयमा शोकसभा आयोजना गरेपछि स्कूल क्याप्टेन, बाल समूह अध्यक्षलगायत विद्यार्थीको उपस्थितिमा मन्थलीस्थित ग्लोबल आइएमई बैंकमार्फत प्रधानमन्त्री दैवी प्रकोप उद्धार कोषमा जम्मा गरिएको हो ।
स्कूल क्याप्टेन युनिशा श्रेष्ठले बाढीबाट प्रभावित रसुवा र नुवाकोटका आफूजस्तै विद्यार्थी साथीहरूलाई सानो भए पनि सहयोग गर्न पाउँदा खुसी लागेको बताइन्।
केब्स स्कूलका पूर्वविद्यार्थी तथा मन्थली–१ का सुन्दर श्रेष्ठसमेत भोटेकोशी बाढीमा बेपत्ता रहेकाले विद्यालय परिवार शोकमा रहेको प्रिन्सिपल केशव तिमल्सिनाले बताए।
तिमल्सिनाका अनुसार विद्यालय प्रशासनले समेत केन्द्रीय प्याब्सन राहत कोषमार्फत प्रधानमन्त्री दैवी प्रकोप उद्धार कोषमा थप सहयोग गर्नेछ। प्याब्सन केन्द्रले देशभरका संस्थागत विद्यालयबाट सहयोग संकलन गरी करिब १० करोड रुपैयाँ सरकारलाई हस्तान्तरण गर्ने तयारी गरेको उनले जानकारी दिए।