लगातार ६ दिनसम्म हिउँमा फसेका बाबुछोरा गाउँ फर्किएका छन् । ताप्लेजुङको मिक्वाखोला गाउँपालिका–५ पापुङको लोदेनस्थित हिउँमा फसेका बाबुछोरा आज गाउँ फर्किका हुन् । हिमपात रोकिएसँगै जमेको हिउँ पनि पग्लिदै गएपछि उनीहरू फर्किन सफल भएका हुन् ।
अन्दाजी ५०/५५ वर्षका लाक्पाटाँसी र उनका १४/१५ वर्षीय छोरा पासाङ शेर्पा गत बुधबारदेखि हिउँमा फसेका थिए । चौँरी गोठ सार्ने क्रममा हिउँपहिराले बगाएपछी उनीहरू ओडारमा अल्झिएर बचेका थिए ।
उद्धारका लागि गत शनिबार र आइतबार धेरै पटक हेलिकप्टर गए पनि बाबुछोरा बसेको ठाउँ पहिचान गर्न नसक्दा उद्धार हुन सकेको थिएन ।
ताप्लेजुङ प्रमुख जिल्ला अधिकारी उमेश पाण्डेका अनुसार हिउँमा फसेका बाबुछोराको स्वास्थ्य अवस्था सामान्य रहेको छ । समुद्र समत चार हजार मिटर उचाइमा अवस्थित पापङको लोनाक भन्ने ठाउँमा चौँरी गोठ सार्ने क्रममा बाबुछोरा हिउँमा फसेका थिए ।
