सँगै हिड्ने अवसर पाए हुन्थ्यो ।
नदिले बगर बगाए हुन्थ्यो ।।
कहिल्यै खोज्ने दिन नआए हुन्थ्यो ।
तिमी यसरी दिलभित्र हराए हुन्थ्यो ।।
जिउँन खोज्दैछन् सुकेका पातहरू ।
हावाले हाँगा नहल्लाए हुन्थ्यो ।।
बैसाखी बेचेर खानेले सोच्दो हो ।
फेरि कसैले खुट्टा गुमाए हुन्थ्यो ।।
म छोड्न सक्थेँ ऊ छोड्न सक्दिनँ ।
उसलाई कसैले मन पराए हुन्थ्यो ।।
चर्न आउँछन् कुल्चेर जान्छन् पशुहरु ।
मैदानको छातीमा घाँस नपलाए हुन्थ्यो ।।
तपाईंको गुनासो तपाईं आफै सुन्नुहोस् ।
बहिरो दुनियाँले सोच्दैन सुनाए हुन्थ्यो ।।
नरेश क्षेत्री स्टोन
बझाङ
