काठमाडौं । ललितपुर र भक्तपुरले आज सर्वपक्षीय बैठक बोलाएका छन् । जिल्ला आफैले गर्नुपर्ने कामको तयारीका लागि ललितपुर र भक्तपुरका प्रमुख जिल्ला अधिकारीहरुले आज छुट्टाछुट्टै सर्वपक्षीय बैठक बोलाएका हुन् ।
कोरोना संक्रमणको जोखिम बढेपछि काठमाडौं उपत्यकामा स्वास्थ्य सतर्कता र पूर्वतयारीका काम अघि बढाउने तयारी स्वरुप छुट्टाछुट्टै छलफल गरेपछि तीनवटै प्रमुख जिल्ला अधिकारीहरुको संयुक्त बैठक बसेर आवश्यक अनुसारको निर्णय लिइने बताईएको छ ।
स्वास्थ्य मापदण्ड पालनामा कडाइ गर्ने, खोप कार्यक्रमलाई तीव्रता दिने र स्वास्थ्य पूर्वाधार तयारी अवस्थामा राख्ने गरी तयारी थालिएको हो ।
भक्तपुर प्रमुख जिल्ला अधिकारी रुद्रादेवी शर्माले आफूले जिल्लाका राजनीतिक दलका नेता, जनप्रतिनिधिहरु, सुरक्षा अधिकारीहरु, नागरिक समाज, पत्रकार, गैरसरकारी संस्थाका प्रतिनिधि लगायतसँग परामर्श लियपछी सके आजै नत्र भोली सम्म सयुक्त बैठक बस्ने बताउनु भएको छ ।
उहाका अनुसार आज दिउँसो दुई बजे जिल्ला प्रशासन कार्यालय भक्तपुरमा बैठक बोलाइएको छ ।
कोरोनाको संक्रमण बढ्दै गएपछि दुई दिनअघि सीसीएमसीको बैठक बसेको भएपनि उक्त बैठकका निर्णय सार्वजनिक गरिएको छैन ।
त्यस्तै यता ललितपुर प्रमुख जिल्ला अधिकारी घनश्याम उपाध्यायले पनि कोरोना संक्रमणको अवस्था र खोप कार्यक्रमलाई लक्षित गरी आज दिउँसो साढे २ बजे बैठक बोलाएको जानकारी दिनुभएको छ । कोरोना संक्रमणको ग्राफ बढ्दै गएको बताउँदै उहाले मानिसहरुको चहलपहललाई घटाउनुपर्ने महसुस गरिएको बताउनु भएको हो ।
काठमाडौं प्रमुख जिल्ला अधिकारी गोविन्द रिजालले उपत्यकाका प्रजिअहरुको संयुक्त बैठकको मिति र समय तय भइ नसकेको बताउनु भएको छ । उहाका अनुसार ललितपुर र भक्तपुरको जस्तो छुट्टै बैठक बोलाइएको नभए पनि अनौपचारिक छलफल गर्दै स्वास्थ्य मापदण्ड पालना गराउने र अन्य तयारीका सम्बन्धमा तयारी अघि बढाउने लगायतका काम गरिएको प्रजिअ रिजालले बताउनु भएको छ ।
