काठमाण्डौ । बतास समूहसँग पशुपतिकाे धर्मशाला सञ्चालन सम्झौता खारेज गर्न सिफारिस गरिएको छ । संस्कृति, पर्यटन तथा नागरिक उड्डययन मन्त्री प्रेम आलेकै प्रस्तावमा पशुपति क्षेत्र विकास कोषको सञ्चालक परिषद्ले गठन गरेको छानबिन समितिले बतास समूहसँगको सम्झौता खारेज गर्न सिफारिस गरेको हो ।
सिंहदरबारमा रेष्टुरेन्ट संचालनको कुरा छानबिन भएसगैं पशुपतिमा धर्मशाला भाडामा लिएर महँगोमा होटल चलाएको भन्दै चौतर्फी बिरोध तथा आलोचना भएपछि मन्त्री आलेले केहि दिन अघि धर्मशाला अनुगमन गरेका थिए ।
छानबिन समितिका संयोजक तथा कोषका कोषाध्यक्ष नारायण सुवेदीले संस्कृति मन्त्रालयका सचिव तथा परिषद्का सदस्य महेश्वर न्यौपानेलाई प्रतिवेदन बुझाएक हुन् । आज मन्त्रालयमा आयोजित पत्रकार सम्मेलनमा कोषाध्यक्ष सुवेदीले विभिन्न कारण देखाएर सम्झौता खारेज गर्न समितिले सिफारिस गरेको बताए ।
छानबिन समितिको प्रतिवेदनमा अधिकार प्राप्त निकायको स्वीकृति विना सम्झौता गरेको, मिलोमतोमा मापदण्ड बनाएर ठेक्का गरेको हुनसक्ने देखिएको, सम्झौता विपरीत बेड सङ्ख्या, दररेट राखेर धर्मशाला सञ्चालन गरिएको, स्वीकृति विना संरचनाहरू थप गरिएको, धर्मशालाभित्र विभिन्न कार्यालयहरू राखेको, समयमै भाडा नबुझाएको लगायतका कारणहरु सहित सम्झौता रद्द गर्नु पर्ने भनिएको छ ।
नेपाल भारत मैत्री धर्मशाला भारत सरकारको ४० करोड रुपैयाँको लागतमा निर्माण भएको हो । धर्मशालालाई पशुपति क्षेत्र विकास कोषले होटेल आनन्द प्रालि (बतास समूह) लाई भाडामा दिएको थियो ।
