विरेन्द्रनगर । सुर्खेतमा करेन्ट लागेर एक जनाको मृत्यु भएको छ। बिहीबार दिउँसो वीरेन्द्रनगर–११ धुलियाबीटमा स्थानीय २२ वर्षका भुवन बुढाको करेन्ट लागेर मृत्यु भएको हो।
जिल्ला प्रहरी कार्यालय सुर्खेतका अनुसार घरमा जोडेको बिजुलीको तार बाँसमा राखेर अग्लो बनाउन लाग्दा उनलाई तार अग्लो बनाउन प्रयोग गरिएको बाँस खाडलमा राख्नेबेला फुत्किएर बिजुलीको नांगो तारमा खसेपछि बुढालाई करेन्ट लागेको हो ।
उनले बाटो बनाउन लागेकाले तार अग्लो बनाउन लागेका थिए तर तार राख्न बनाइएको बाँस खाल्डोमा हाल्दा खोज्दा एक्कासी फुत्किएर बिजुलीको मुख्य तारमा परेको थियो । त्यही मुख्य तारमा परेको बाँसबाट करेन्ट लिक भएर मानिसलाई करेन्ट लागेको जिल्ला प्रहरी कार्यालय सुर्खेतका प्रवक्ता डिएसपी रामप्रसाद घर्तीले जानकारी दिएका छन् ।
घटनामा साथमा भएकि स्थानीय २० वर्षका दुर्गा रोकाया पनि घाइते भएका छन् । उनको वीरेन्द्रनगरस्थित देउती अस्पतालमा उपचार भइरहेको र उनको अबस्था सामान्य रहेको छ।
