सेयर बजार २५१० अंकमा, किन घट्यो बजार?

काठमाडौं। चर्किँदो तरलता अभावसँगै बढेको निक्षेपको ब्याजका कारण सेयर बजारमा मंगलबार पनि पहिरो गएको छ। बजार १०० अंकसम्म घटेको थियो। बीचमा केही सम्हालिएर ७७ अंकको गिरावटसहित बन्द भएको छ।
सुरुबाटै घट्न थालेको बजार २५१० अंकमा बन्द भएको हो। बजार २४ सय अंकको लाइनमा आइसकेको थियो। दिनभरीमा २२१ कम्पनीको ३ अर्ब ७७ करोड रुपैयाँको सेयर कारोबार भएको छ।
बाणिज्य बैंक समूह ५१.६६ अंकले घटेको छ। जीवन बीमा समूह ४२८ अंकले झरेको छ भने निर्जीवन बिमा ३१४ अंकले तल आएको छ।
मंगलबार सबैभन्दा बढि नबि बैंक र एनसीसी बैंक (संस्थापक) सेयर कारोबार भएको छ। नबिलको ११ करोड १२ लाख रुपैयाँको कारोबार भएको छ। एनसीसीको भने १० करोड रुपैयाँको कारोबार भएको छ। एनसीसीको १२१ रुपैयाँका दरले कारोबार भएको हो। केही समयअघि यी दुई बैंक मर्जरमा जाने चर्चा थियो।
बजार घट्नुको प्रमुख कारण बैंक ब्याज दर हो। बैंकहरुले ब्याज ११.६७ प्रतिशतसम्म पुर्याएका छन्। एक दर्जन बैंकको ब्याज १० प्रतिशतमाथि छ। ब्याज अझै बढ्ने विश्लेषण हुन थालेको छ। अहिलेको अवस्थमा जोखिम लिएर सेयरमा लगानी गर्नुभन्दा १० प्रतिशत ब्याजमा पैसा लगाउनु उचित ठान्ने पनि लगानीकर्ता छन्। यही मनोविज्ञानका कारण बजार घटेको हो।