विराटनगर, १८ बैशाख – प्रधानमन्त्री केपी शर्मा ओलीले सगरमाथालाई माउन्ट एभरेष्ट भनेर चिनाउनु अनुपयुक्त भएको बताएका छन् । कोशी प्रदेश सरकारद्वारा आयोजित लगानी सम्मेलनको उद्घाटन समारोहलाई आज सम्बोधन गर्दै प्रधानमन्त्री ओलीले सगरमाथाको वास्तविक नाम सगरमाथा नै हुनुपर्नेमा जोड दिएका हुन् ।
उनले भने, “माउन्ट एभरेस्ट भनेर सगरमाथाको नाम जसको नाममा राखियो, ती ब्रिटिस नागरिक जर्ज एभरेष्ट हुन् । तर ती व्यक्तिले सगरमाथा होइन, ल्होत्से हिमाल अग्लो छ भनेर बताएका थिए ।तर, उनका नाममा सगरमाथा माउन्ट एभरेस्ट किन राखियो ? त्यो बुझिनसक्नु छ ।”
ओलीले सगरमाथालाई माउन्ट एभरेष्ट भनिनु ऐतिहासिक अन्याय भएको टिप्पणी गरे । “एभरेष्ट भन्ने व्यक्ति त हिमाल चढेका पनि थिएनन् । अनि सगरमाथा होइन भन्ने व्यक्तिको नाममा हामीले किन हाम्रो सर्वोच्च शिखर चिनाउने ?” भन्दै उनले असन्तुष्टि जनाए ।
प्रधानमन्त्री ओलीले सगरमाथा नेपाली पहिचानको प्रतीक भएकाले यसको नाममा ‘नक्कली नाम’ जोडिनु अनुचित भएको बताए । “सोलुखुम्बुमा अवस्थित विश्वकै सर्वोच्च शिखर सगरमाथा हो, त्यसैले सगरमाथा नै भनौं,” उनले भने ।
