रामेछापमा कानुनी राज्यको अनुभूति गराउँछु’ : प्रमुख जिल्ला अधिकारी कुँवर

रामेछाप । नवनियुक्त प्रमुख जिल्ला अधिकारी विनु बज्राचार्य कुँवर ले रामेछापका नागरिकलाई कानुनी राज्यको वास्तविक अनुभूति हुने गरी प्रशासन सञ्चालन गर्ने प्रतिबद्धता व्यक्त गरेकी छन्।
शुक्रबार जिल्लास्थित सञ्चारकर्मीसँग आयोजित पहिलो परिचयात्मक कार्यक्रममा बोल्दै प्रमुख जिल्ला अधिकारी कुँवरले शान्ति सुरक्षा, सुशासन र प्रभावकारी सेवा प्रवाहलाई आफ्नो पहिलो प्राथमिकता बनाउने बताइन्। उनले कानुनको निष्पक्ष कार्यान्वयन गर्दै नागरिकको विश्वास जित्ने गरी प्रशासन अघि बढ्ने स्पष्ट पारिन्।
जिल्लामा कानुनी राज्यको अनुभूति गराउने, शान्ति सुरक्षा कायम गर्ने र सुशासन प्रवर्द्धन गर्दै प्रशासनले निर्वाह गर्नुपर्ने सबै जिम्मेवारी इमान्दारीपूर्वक पूरा गर्छु, उनले भनिन्।
कुँवरले रामेछापको भौगोलिक विकटता, विकासका चुनौती र स्थानीय आवश्यकतालाई मध्यनजर गर्दै प्रशासनले परिणाममुखी ढंगले काम गर्ने बताइन्। पत्रकारहरूबाट प्राप्त सुझावलाई गम्भीरतापूर्वक ग्रहण गर्दै आवश्यक समन्वय र कार्यान्वयनका लागि पहल गर्ने उनको प्रतिबद्धता थियो।
अरूलाई परिवर्तनको सन्देश दिनुभन्दा पहिले परिवर्तन आफ्नै व्यवहारबाट सुरु हुनुपर्छ भन्ने मान्यताका साथ काम गर्नेछु, उनले भनिन्। सबै सरोकारवालासँग सहकार्य, समन्वय र पारदर्शितामार्फत प्रशासनलाई अझ जिम्मेवार, उत्तरदायी र प्रभावकारी बनाइने उनले उल्लेख गरिन्।
कार्यक्रममा सहभागी पत्रकारहरूले पहिरो प्रभावितहरूको व्यवस्थापन, जलविद्युत् आयोजनाबाट उत्पन्न स्थानीय समस्या, सडक पूर्वाधार, ट्राफिक व्यवस्थापन, बजार अनुगमन तथा सार्वजनिक यातायात क्षेत्रमा देखिएका चुनौतीबारे प्रशासनको ध्यानाकर्षण गराएका थिए।
प्रमुख जिल्ला अधिकारी कुँवरले पत्रकारहरूले उठाएका सबै विषयलाई प्राथमिकताका साथ सम्बोधन गरिने बताउँदै सम्बन्धित निकायसँग आवश्यक समन्वय गरी नागरिकले प्रत्यक्ष अनुभूति गर्ने गरी काम गर्ने प्रतिबद्धता व्यक्त गरिन्। उनले कानुनको शासन स्थापित गर्दै निष्पक्ष र जनउत्तरदायी प्रशासन निर्माणमा आफू दृढ रहेको समेत बताइन्।