मन्थलीमा उत्कृष्ट १० शिक्षक घोषणा

रामेछाप, मन्थली नगरपालिका वडा नं. १ को आयोजना तथा रामेछाप युनेस्को संगी शिक्षा कार्यक्रम नेपालको सहजीकरणमा शैक्षिक सुधारका लागि शिक्षक सम्मेलन २०८३ सम्पन्न भएको छ।
मन्थलीस्थित तीनलाल पार्कमा जेठ २३ गते आयोजित सम्मेलनले नगरपालिकाभित्रका सामुदायिक तथा संस्थागत विद्यालयमा कार्यरत १० जना शिक्षकलाई उत्कृष्ट शिक्षक घोषणा गरेको छ। उत्कृष्ट शिक्षक घोषित हुनेहरूमा मोतिलाल लामा रुद्राक्षश्वर मावि मन्थली ७ गोपाल सिंह रावल सरस्वती मावि मन्थली १० चनखु, सुस्मा बुढाथोकी तामाकोसी आवासीय विद्यालय मन्थली १, घनश्याम खरेल कर्कलादेवी अंग्रेजी स्कुल मन्थली १, लब दाहाल मन्थली मावि मन्थली १, झलकप्रसाद भट्टराई सिद्धेश्वर मावि मन्थली ४ सालु, रविन्द्रकुमार घिमिरे सेतीदेवी मावि मन्थली ४ सालु, हस्त लामा लिटिल स्टार विद्यालय मन्थली १, बसुदेव काफ्ले भैरबी माबी मन्थली ५ सुनारपानी तथा खेतबहादुर खत्री मन्थली ४ सालु रहेका छन्।
सम्मेलनमा मन्थली नगरपालिकाभित्रका संस्थागत तथा सामुदायिक विद्यालयका शिक्षकहरूको सहभागिता रहेको थियो। शिक्षकहरूको कार्यसम्पादनको मूल्याङ्कन गर्दै शिक्षण पेशाप्रति थप उत्साह, जिम्मेवारी र प्रतिस्पर्धात्मक भावना विकास गर्ने उद्देश्यले उत्कृष्ट शिक्षक घोषणा गरिएको आयोजकले जनाएको छ।
कार्यक्रममा बोल्दै मन्थली माध्यमिक विद्यालयका प्रधानाध्यापक टंकप्रसाद दाहालले उत्कृष्ट शिक्षक छनोटले शिक्षकहरूलाई थप जिम्मेवार र परिणाममुखी बन्न प्रेरित गर्ने बताए। उनले यस्ता कार्यक्रमले शैक्षिक गुणस्तर सुधारमा सकारात्मक योगदान पुग्ने विश्वास व्यक्त गरे।
रामेछाप प्याब्सनका अध्यक्ष केशव तिमल्सिनाले सामुदायिक र संस्थागत विद्यालयका शिक्षकबीच कुनै विभेद हुन नहुने बताउँदै सबै शिक्षकलाई समान अवसर प्रदान गर्नुपर्ने धारणा राखे। संस्थागत विद्यालयका शिक्षकहरूलाई समेत उत्कृष्ट शिक्षकको सूचीमा समेटिनु सकारात्मक पक्ष भएको उल्लेख गर्दै उनले आगामी दिनमा नगरपालिका स्तरका तालिम, गोष्ठी तथा शैक्षिक कार्यक्रमहरूमा संस्थागत विद्यालयलाई पनि समावेश गर्न आग्रह गरे।
उत्कृष्ट शिक्षक घोषणा कार्यक्रमले शिक्षकहरूको मनोबल बढाउनुका साथै शिक्षण क्षेत्रमा उत्कृष्ट कार्य गर्ने संस्कृतिको विकास गर्न सहयोग पुग्ने मन्थली नगरपालिका १ का वडा अध्यक्ष होम प्रसाद पौडेलले बताए।
सम्मेलनमा दरबार हाइ स्कुल भानुका प्रअ शारदा पौडेल, डहु माबिका सहयोग प्रअ हिरालाल तामाङ, मन्थली माबिका प्रअ टंक प्रसाद दाहल र तामाकोसी आवासीय बिधालयका प्रअ दिपक खड्काले बिधालएका सिकाइका बारेमा प्रस्तुतीकरण गरेका थिए।