खाँडादेवी पर्यटन व्यवसायिक सहकारीका कर्मचारीद्वारा गाउँपालिकाका कर्मचारीमाथि हातपात

रामेछाप । खाँडादेबी पर्यटन व्यवसायिक सहकारी संस्थाद्वारा सञ्चालित पाहुनाघरका व्यवस्थापक प्रेम तामाङले खाँडादेबी गाउँपालिकाका कर्मचारीमाथि हातपात गरेको आरोप लागेको छ।
गाउँपालिकाका प्रमुख प्रशासकीय अधिकृतका अनुसार निर्माण सम्बन्धित काममा प्राविधिक स्टिमेटभन्दा बढी रकम भुक्तानी गर्नुपर्ने भन्दै तामाङले कर्मचारीमाथि दबाब दिँदै आएका थिए। सम्बन्धित कर्मचारीले कानुन र प्रचलित प्रक्रिया विपरीत भुक्तानी गर्न नमिल्ने अडान लिएपछि विवाद चर्किएको र त्यसक्रममा हातपात भएको प्रमुख प्रशासकीय अधिकृतले बताएका छन्।
घटनापछि पीडित पक्षले जिल्ला प्रहरी कार्यालय रामेछापमा उजुरी दिएको छ। जिल्ला प्रहरी कार्यालयका इन्स्पेक्टर राजन तिमल्सिनाका अनुसार घटनामा संलग्न व्यक्तिविरुद्ध म्याद थप गरी अनुसन्धान भइरहेको छ।
इन्स्पेक्टर तिमल्सिनाले भने, राष्ट्रसेवक कर्मचारीमाथि हातपात भएको विषय गम्भीर छ। घटनामा म्याद थप गरी अनुसन्धान भइरहेको छ। अनुसन्धानबाट दोषी देखिए कानुनबमोजिम कारबाही गरिन्छ।”
यता, खाँडादेबी पर्यटन व्यवसायिक सहकारी संस्थाले घटनाबारे हालसम्म कुनै आधिकारिक धारणा सार्वजनिक गरेको छैन। संस्थाका व्यवस्थापक प्रकाश बुढाथोकीले घटनाबारे कानुनी प्रक्रियाको सम्मान गर्दै आवश्यक सहयोग गर्ने र कानुनको पालना गरिने बताएका छन्।।