काठमाडौँ, १८ असार
भौतिक पूर्वाधार तथा यातायातमन्त्री देवेन्द्र दाहालले यस वर्षको बजेटमा अलपत्र परेका योजना सम्पन्न गर्न विशेष प्राथमिकता दिइएको बताउनुभएको छ।
राष्ट्रिय सभामा विनियोजन विधेयकमाथि उठेका प्रश्नहरूको जवाफ दिँदै मन्त्री दाहालले कतिपय पुल र बाटा जस्ता पूर्वाधार निर्माण भइसक्दा पनि अलपत्र अवस्थामा रहेको उल्लेख गर्नुभयो।
उहाँले भन्नुभयो, “अलपत्र परेका योजनाहरुलाई सम्बोधन गर्न वर्ष पनि बजेट राखेका छौँ र आगामी वर्ष पनि राख्छौँ । पूर्ण रुपमा लगत सङ्कलन गरेर काम गर्छौं।”
मन्त्री दाहालले बजेटलाई जनमैत्री बनाउने र उत्पादनसँग जोड्ने प्रयास भइरहेको जानकारी दिनुभयो। उहाँले पूर्व–पश्चिममा निर्माण भइरहेको चार वटा राजमार्गले रोजगारी सिर्जना, व्यापार वृद्धि र आर्थिक विकासमा महत्वपूर्ण योगदान पुर्याउने विश्वास व्यक्त गर्नुभयो।
उहाँले बजेट सन्तुलनमा गत वर्षको ट्रेन्डभन्दा परिवर्तन गर्न नसकेको स्वीकार्नुभयो। मन्त्री दाहालले भन्नुभयो, “तर बजेट विनियोजनलाई व्यवस्थित बनाउँदै लैजानुपर्छ।”
रु तीन करोडभन्दा कमका योजनाको सन्दर्भमा उहाँले नियमित प्रकृतिका आयोजनाहरूका लागि भुक्तानी गर्न बाँकी रकम छुट्याइएको वा केही योजना अध्ययन चरणमा रहेको जानकारी दिनुभयो।
