काठमाडौँ : नेपाली कांग्रेसका सांसद डा. शेखर कोइरालाले देशको राजनीतिक र सामाजिक अवस्था दिनप्रतिदिन अधोगतितर्फ उन्मुख भइरहेको बताएका छन्। काठमाडौँस्थित ज्ञानज्योति महिला माध्यमिक विद्यालयको २०औँ वार्षिकोत्सव समारोहमा शुक्रबार बोल्दै उनले यस्तो टिप्पणी गरेका हुन्।
सांसद कोइरालाले देशको स्खलनतर्फ उन्मुख अवस्थालाई सुधार्ने जिम्मेवारी विद्यालय, राजनीतिज्ञ र सरकारी कर्मचारी सबैको रहेको बताए। उनले सबै मिलेर सकारात्मक सोचका साथ अघि बढ्न जरुरी रहेको र यसले मात्र देशलाई प्रगतिपथमा ल्याउन सक्ने बताए।
सांसद कोइरालाले विद्यालयलाई केवल अनुदान मात्र दिएर विकास सम्भव नभएको पनि स्पष्ट पारे। उनले भने, “लोकतन्त्रमा शिक्षा नै सबैभन्दा महत्वपूर्ण कुरा हो। शिक्षित समाजले मात्र सभ्य देश निर्माण गर्न सक्छ। घरमा एउटा महिला शिक्षित भए भने पुरै परिवार शिक्षित हुन्छ।”
उनले थपे कि हामी कतै न कतै चुकिरहेका छौँ – नियम, ऐन, कानून बनाउने, सरकारमा बस्ने व्यक्तिहरु, र पत्रकार मित्रहरु समेत आफ्नो जिम्मेवारीमा पूर्ण रूपमा ध्यान दिइरहेका छैनन्।
सांसद कोइरालाले भने, “सार्वजनिक विद्यालयलाई प्रवद्र्धन गर्ने हिसाबले अघि बढ्नुपर्छ भने मात्र हामी सफल हुन सक्छौँ। अहिले न केवल राजनीतिक, तर सामाजिक अवस्था पनि स्खलनतर्फ गएको छ। यसलाई सुधार्ने जिम्मेवारी स्कूल, राजनीतिज्ञ र कर्मचारीले लिनुपर्छ। सकारात्मक सोचका साथ अघि बढ्नाले मात्रै देशलाई अघि बढाउने सपना पुरा गर्न सकिन्छ।”
सांसद कोइरालाले राज्यका सामुदायिक विद्यालयलाई अझ राम्रो बनाउन सरकारले विशेष ध्यान दिनुपर्ने आवश्यकता रहेको बताए।
