काठमाडौं: बाढीले क्षति पुर्याएको बीपी राजमार्गको काभ्रेभञ्ज्याङ–भकुन्डेबेशी खण्ड अब दिनरात २४ घण्टा सञ्चालन हुने भएको छ।
आसन्न दसैँ–तिहारलगायतका चाडपर्वमा यात्रुहरूलाई सहज यात्रा सुनिश्चित गर्न जिल्ला सुरक्षा समितिले आजदेखि रातिको सवारी आवागमनमा लगाइएको रोक हटाउने निर्णय गरेको हो।
यसअघि सामान्य वर्षामा पनि पहिरोको जोखिम बढी हुने भएकाले भदौ मसान्तसम्म बेलुकी ५ बजेदेखि बिहान ५ बजेसम्म सवारी सञ्चालन निषेध गरिएको थियो। तर, सोमबार बसेको जिल्ला सुरक्षा समितिको बैठकले स्वीकृत सुरक्षा कार्ययोजनाअनुसार सावधानी अपनाई सडकलाई चौबीसै घण्टा सञ्चालन गर्ने निर्णय गरेको हो।
जिल्ला प्रशासन कार्यालय काभ्रेपलाञ्चोकले जारी गरेको सूचनामा भनिएको छ, “आसन्न चाडपर्वमा यात्रुको सहज यात्राका लागि सडक चौबीसै घण्टा सञ्चालन गरिने भएकाले सम्बन्धित सबैले सडक सुरक्षा मापदण्ड पालना गर्नुपर्नेछ।” साथै प्रशासनले सम्भावित जोखिमबारे यात्रुलाई सचेत रहन आग्रह गर्दै सडक सुरक्षाका लागि अनुगमन कडाइ गर्ने जनाएको छ।
