काठमाडौँ: जेनजीको आह्वानमा भएको प्रदर्शनका क्रममा ज्यान गुमाउनेको सम्झनामा आज (बुधबार) सरकारले देशभर शोक मनाइरहेको छ। यस अवसरमा सरकारी कार्यालयहरू, विदेशस्थित नेपाली दूतावास र नियोगमा सार्वजनिक बिदा दिइएको छ भने राष्ट्रिय झण्डा आधा झुकाइएको छ।
भ्रष्टाचार नियन्त्रण, सुशासन र पारदर्शिताका माग राख्दै जेनजीले भदौ २३ गते राजधानीमा प्रदर्शन गरेका थिए। सो क्रममा प्रहरीले चलाएको गोली लागेर १९ जनाको मृत्यु भएको थियो।
घटनापछि भदौ २४ गते देशव्यापी प्रदर्शन भई दुई दिनसम्म चलेको आन्दोलनमा सुरक्षाकर्मी र प्रदर्शनकारी गरी ७२ जनाले ज्यान गुमाएका थिए। आन्दोलनका क्रममा सरकारी तथा निजी सम्पत्तिमा आगजनीसमेत भएको थियो।
