काठमाडौँ: गृहमन्त्री ओमप्रकाश अर्यालले आज प्रहरी प्रधान कार्यालयमा पुगेर जेनजी आन्दोलनका क्रममा भएको क्षतिको जानकारी लिएका छन्। सो अवसरमा उनले प्रहरी कर्मचारीलाई उच्च मनोबलका साथ राष्ट्र र जनताको हितमा समर्पित हुन निर्देशन दिएका छन्।
गृहमन्त्री अर्यालले आन्दोलनका क्रममा क्षतिग्रस्त प्रहरी इकाइको पुनःस्थापना र प्रहरीको मनोबल उच्च राख्न समुदायले देखाएको सहकार्यप्रति आभार व्यक्त गर्दै प्रहरीको आवश्यकता र महत्व थप पुष्टि भएको बताए।
“तपाईंहरू उच्च मनोबलका साथ जनताको हितमा काम गर्नुस्,” मन्त्री अर्यालले प्रहरीलाई सम्बोधन गर्दै भने। उनले प्रहरीको कार्यक्षेत्रमा रहेका कमीकमजोरी सुधार गर्दै अगाडि बढ्नुपर्नेमा जोड दिए।
उनले थपे, “तपाईंहरू कर्तव्यनिष्ठ र संयमित भएर आफ्नो जिम्मेवारी निर्वाह गर्नुहुनेछ भन्नेमा वर्तमान सरकार विश्वास लिएको छ। यो सरकार उच्च मनोबलयुक्त प्रहरीको पक्षमा छ।”
यसअघि गृहमन्त्री अर्यालले काठमाडौँ उपत्यका प्रहरी कार्यालय रानीपोखरी, प्रहरी वृत्त दरबारमार्ग र प्रहरी वृत्त महाराजगञ्जमा पुगेका थिए।
कार्यक्रममा नेपाल प्रहरीका सातै प्रदेशका प्रहरी प्रमुख, जिल्ला प्रहरी कार्यालयका प्रमुख र इलाका प्रहरी कार्यालयका प्रमुखहरू भर्चुअल माध्यममार्फत सहभागी भएका थिए।
