काठमाडौं: नेपाली कांग्रेसका महामन्त्री विश्वप्रकाश शर्माले अब पार्टीले संसद् पुनर्स्थापनाको माग राख्न नहुने बताएका छन्।
पार्टीको एक कार्यक्रममा बोल्दै उनले निर्वाचनको मिति घोषणा भइसकेकाले कांग्रेसले निर्वाचनमै ध्यान दिनुपर्ने धारणा राखे। उनले राष्ट्रपति रामचन्द्र पौडेलले अप्ठ्यारो परिस्थितिलाई सम्हालेर निर्वाचनको मिति घोषणा गरेको स्मरण गर्दै अब पार्टीभित्र संसद् विघटनबारे दुईमत हुन नहुने बताए।
‘राष्ट्रपतिले सेनालाई विश्वासमा राखेर नयाँ सरकार बनाएर निर्वाचनमा जाने वातावरण बनाइरहेका बेला संसद् पुनर्स्थापनाको माग गर्नु उपयुक्त हुँदैन,’ शर्माले भने।
उनले यसबारेमा पार्टीले केन्द्रीय समितिबाट सामूहिक धारणा बनाउनुपर्ने आवश्यकता औंल्याए।
महामन्त्री शर्माले जेन–जी पुस्ताले उठाएका मागप्रति समर्थन जनाउँदै वर्तमान सरकारमा उनीहरूको प्रतिनिधित्व नहुनु गम्भीर कमजोरी भएको टिप्पणी गरे। उनका अनुसार बलिदान गर्ने, परिवर्तनका लागि लड्ने र सरकार बनाउन योगदान गर्ने जेन–जी पुस्ताको सहभागिताबिना सरकार बन्नु आपत्तिजनक छ।
‘सरकारमा सयौँ मान्छे भए पनि जेन–जीको प्रतिनिधित्व आवश्यक छ,’ उनले जोड दिए।
