काठमाडौँ: देशका ७५ जिल्लामध्ये दुई जिल्लाबाहेक सबैमा डेङ्गु फैलिएको छ। इपिडिमियोलोजी तथा रोग नियन्त्रण महाशाखा (इडिसिडी)का तथ्यांकअनुसार हालसम्म ६ हजार ६६८ जनामा डेङ्गु संक्रमण पुष्टि भएको छ भने पाँच जनाको मृत्यु भएको कीटजन्य शाखा प्रमुख डा. गोकर्ण दाहालले जानकारी दिएका छन्।
डोल्पा र मनाङमा भने अहिलेसम्म संक्रमण देखिएको छैन। सबैभन्दा बढी बागमती प्रदेशमा एक हजार ६४९ संक्रमित पत्ता लागेका छन्। त्यस्तै गण्डकीमा एक हजार ६३१, लुम्बिनीमा एक हजार ११७, कोशीमा ८९६, सुदूरपश्चिममा ७६२, कर्णालीमा ४७४ र मधेश प्रदेशमा १३९ जनामा डेङ्गु पुष्टि भएको छ।
चिकित्सकका अनुसार एडिज जातका लामखुट्टेको टोकाइबाट सर्ने डेङ्गु सफा पानी जम्ने ठाउँमा फैलिन सक्छ। सरुवा रोग विशेषज्ञ डा. शेरबहादुर पुनका अनुसार असाध्यै शरीर दुख्ने, खाना खान मन नलाग्ने, पखाला लाग्ने डेङ्गुका प्रमुख लक्षण हुन्।
उच्च ज्वरो, आँखाको गेडीसहित जोर्नी–मांसपेशी दुख्ने, शरीरमा डाबर/रातो दाग देखिने, वाकवाकी वा वान्ता हुने संकेत देखिएमा तुरुन्त स्वास्थ्य संस्थामा पुग्न सुझाव दिइएको छ।
चिकित्सकहरूले डेङ्गुको जोखिम कात्तिकसम्म रहने भएकाले सतर्कता अपनाउन, पानी जम्न नदिई घर–टोल सफा राख्न र चिकित्सकको सल्लाहबिना औषधि नखान आग्रह गरेका छन्।
