काठमाडौं: लगातारको वर्षाका कारण बिपी राजमार्गका विभिन्न स्थानमा पहिरो खसेपछि दुईतर्फी सवारी आवागमन अवरुद्ध भएको छ। बुधबार रातिदेखि परिरहेको अविरल वर्षाले काभ्रे र सिन्धुपाल्चोक जिल्लाका सडक खण्डमा धेरै ठाउँमा पहिरो गएपछि आज बिहानदेखि सडक पूर्ण रूपमा बन्द भएको हो।
जिल्ला प्रहरी कार्यालय काभ्रेका अनुसार चौकीडाँडा, बिरुवा डाँडा, पिप्ले, चारसयबेशी र बोक्सीकुना लगायतका स्थानमा ठूला–साना पहिरो खसेका छन्। सडकमा माटो र ढुंगा थुप्रिएपछि यातायात पूर्णरूपमा रोकिएको प्रहरीले जनाएको छ।
यसअघि बिहीबार मात्रै जिल्ला प्रहरी कार्यालय काभ्रे र सिन्धुलीले वर्षाको जोखिमका कारण बिहीबार साँझदेखि शुक्रबार बिहान ६ बजेसम्म बिपी राजमार्गमा यात्रा नगर्न आग्रह गरेका थिए। राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि कात्तिक १३ देखि १५ गतेसम्म सो क्षेत्रमा भारी वर्षाको सम्भावना रहेको भन्दै सतर्कता अपनाउन आग्रह गरेको छ।
