भैरहवा: गृहमन्त्री ओमप्रकाश अर्यालले भदौ २३ र २४ गते जेनजी युवाहरूको आन्दोलनपछि जटिल परिस्थितिमा गठन भएको सरकारले शान्ति–सुरक्षा सामान्य अवस्थामा ल्याउन सफल भएको बताएका छन्। लुम्बिनी प्रदेश सरकार र गृह मन्त्रालयले भैरहवामा आयोजना गरेको प्रदेशस्तरीय सुरक्षा गोष्ठी–२०८२ उद्घाटन गर्दै उनले वर्तमान सरकार सुशासन प्रवर्धन र आसन्न निर्वाचन सफलतापूर्वक सम्पन्न गर्न प्रतिबद्ध रहेको बताए।
उनका अनुसार चुनाव गर्न नसकिने भन्ने भ्रम केही ठाउँमा फैलाइएको भए पनि सरकारले आफ्नो काममार्फत स्पष्ट जवाफ दिइरहेको छ। परिस्थिति अनुरूप विशेष जिम्मेवारी पाएका कारण व्यक्तिगत स्वार्थ नभई राष्ट्रिय आवश्यकता पूरा गर्ने लक्ष्यसहित सरकार काम गरिरहेको उल्लेख गरे।
हामीलाई कुनै किसिमको व्यक्तिगत आकांक्षा र लोभ छैन। प्राप्त जिम्मेवारीलाई अर्जुनदृष्टिमा राखेर सो हासिल गर्ने दिशामा सरकार केन्द्रित छ। त्यसैले हामी सुशासनको आधार बलियो बनाउने, भोलिको दिनमा बिगार्न नसक्ने वातावरण तयार गरी निर्वाचित सरकारलाई सत्ता हस्तान्तरण गर्न आतुर छौं,ु गृहमन्त्री अर्यालले भने।
मन्त्री अर्यालले निष्पक्ष, भयरहित र शान्तिपूर्ण निर्वाचनका लागि सुरक्षा संयन्त्रलाई सुदृढ बनाउने प्रयोजनले सुरक्षा गोष्ठी आयोजना गरिएको बताए। लुम्बिनी प्रदेशका सुशासन र भ्रष्टाचार नियन्त्रणमा प्रदेश सरकारको भूमिकासमेत महत्त्वपूर्ण रहेको उनले उल्लेख गरे।
लुम्बिनी प्रदेशका मुख्यमन्त्री चेतनारायण आचार्यले २४ गतेको घटनामा जेनजी युवाहरूको घुसपैठ रहेको भन्दै हतियार फिर्ता हुनु र फरार कैदीबन्दी पक्राउ पर्नु निर्वाचन सुरक्षाका लागि अपरिहार्य रहेको बताए।
सहसचिव सुरेश पन्थीले फागुन २१ गते हुने प्रतिनिधिसभा निर्वाचनका लागि शान्ति–सुरक्षा कायम राख्नु सबै तहका कर्मचारीको दायित्व भएको बताए। उनले गोष्ठीले प्रदेशको सुरक्षा चुनौती पहिचान गरी प्रभावकारी रणनीति बनाउने विश्वास व्यक्त गरे।
गोष्ठीमा गृह मन्त्रालय, प्रदेश सरकार, नेपाली सेना, नेपाल प्रहरी, सशस्त्र प्रहरी बल, राष्ट्रिय अनुसन्धान विभागका उच्च अधिकारी तथा जिल्ला सुरक्षा समितिका प्रतिनिधिहरू लगायत सञ्चारकर्मीहरूको उपस्थिति थियो।
