काठमाडौँ: राष्ट्रपति रामचन्द्र पौडेलले राजनीतिक संघर्षको दुष्चक्रबाट बाहिर निस्किएर अबको समय मुलुकको आर्थिक विकास र समृद्धिमा केन्द्रित हुनुपर्ने बताएका छन्।
नेपाल प्रजातन्त्र सेनानी सङ्घका पदाधिकारीसँगको भेटमा राष्ट्रपति पौडेलले मुलुकको आर्थिक विकास र समृद्धिका लागि राजनीतिक स्थायित्व र सुशासनको आवश्यकतामा जोड दिनुभयो। उहाँले भ्रष्टाचारको अन्त्य गर्दै सुशासनमार्फत विकासका लक्ष्य हासिल गर्नु आजको मुख्य चुनौती भएको बताए।
राष्ट्रपतिले आगामी फागुन २१ गते तय भएको प्रतिनिधिसभा सदस्यको निर्वाचनलाई निर्बाध सम्पन्न गराएर राजनीतिक अवस्था सहज बनाउनु आवश्यक रहेको स्पष्ट पार्नुभयो। उहाँले भने कि युवा पुस्ताको चाहना शान्ति, स्थायित्व र विकासमा केन्द्रित रहेको छ र सामाजिक न्यायसहितको समयानुकूल आर्थिक नीति तथा कार्यक्रममार्फत मुलुकको आर्थिक विकासको सपना साकार गर्नु आजको मुख्य दायित्व हो।
उहाँले प्रजातन्त्र सेनानीहरूले लोकतन्त्र स्थापना र पुनःस्थापनाका लागि गरेको अविश्राम समर्पण र बलिदानको गर्विलो इतिहास स्मरण गर्दै, सङ्घीय लोकतान्त्रिक गणतन्त्रको सुदृढीकरणका लागि प्रजातन्त्र सेनानीहरूको योगदान र चेतावनी अझै आवश्यक रहेको बताउनुभयो।
राष्ट्रपति पौडेलले भन्नुभयो, “मुलुक सङ्घीय लोकतान्त्रिक गणतन्त्र स्थापनाको चरणमा पुग्न सहिद र प्रजातन्त्र सेनानीहरूले गरेको कठोर सङ्घर्ष, त्याग र बलिदान सदैव स्तुत्य छ।”
