रामेछाप ।
भरत प्रसाद चौलागाईं—यो नाम रामेछापका हरेक नागरिकले सुन्दै आएका छन्। चौलागाईं भन्नासाथ अप्ठ्यारोमा पर्दा सम्झिने व्यक्तिका रूपमा उनी परिचित छन्। अस्पतालको बिल तिर्न नसक्दा होस् वा विद्यार्थीले कलेजको शुल्क जुटाउन नसक्दा, धेरैका लागि उनी भरोसाको नाम बनेका छन्।
नेपाली कांग्रेस रामेछापका नेता तथा महाधिवेशन प्रतिनिधि रहेका चौलागाईं हालसम्म कुनै पनि जनप्रतिनिधि पदमा पुगेका छैनन्। तर, समाजसेवा र मानवीय सहयोगका कारण उनी जनप्रतिनिधिभन्दा कम छैनन्। सुनापती गाउँपालिका–१, रामेछापका स्थायी बासिन्दा चौलागाईं समाजका समस्यालाई नजिकबाट बुझ्ने व्यक्तिका रूपमा चिनिन्छन्।
चौलागाईंले पछिल्लो समय विद्यार्थी लक्षित ‘स्कुलमै पुगेर लगाउने कपडा वितरण’ अभियान सुरु गरेका छन्। यही अभियानअन्तर्गत पुष २९ गते मन्थली नगरपालिका भित्रका नर्मदेश्वर आधारभूत विद्यालय, जगदम्बा आधारभूत विद्यालय, मनकामना माध्यमिक विद्यालय र शारदा माध्यमिक विद्यालय (मन्थली–११) गरी चार विद्यालयका करिब ५ सय विद्यार्थीलाई ट्र्याकसुट वितरण गरिएको छ।
विद्यार्थीलाई गरिएको यो सहयोगले शिक्षामा सकारात्मक प्रभाव पर्ने जगदम्बा आधारभूत विद्यालयका शिक्षक गुणराज घिमिरेले बताए। “यसले विद्यार्थीलाई विद्यालय आउन थप हौसला मिलेको छ,” उनले भने।
मनकामना माध्यमिक विद्यालयका प्रधानाध्यापक उत्तम घिमिरेका अनुसार यस्तो सहयोग निकै महत्त्वपूर्ण छ। “जाडो मौसममा बच्चाहरूलाई न्यानो हुने मात्रै होइन, विद्यालय आउँदा लगाउने ड्रेसजत्तिकै उपयोगी भएको छ,” उनले बताए।
शारदा माध्यमिक विद्यालयकी शिक्षिका निर्मला पुलामीले भने यस्तो मानवीय सहयोगप्रति विद्यालय परिवार ऋणी रहेको उल्लेख गरिन्। “विद्यार्थीको आवश्यकतालाई बुझेर गरिएको सहयोग प्रेरणादायी छ,” उनले भनिन्।
मन्थली–८ का नेपाली कांग्रेस सभापति ओमप्रकाश पुरीले भने यस प्रकारको सहयोगमा कुनै राजनीति नगरिएको स्पष्ट पारे। “सके सहयोग गर्ने हो, नसके पनि हामी विद्यालयमा राजनीति गर्ने उद्देश्यले आएका होइनौँ,” उनले जिकिर गरे।
कार्यक्रममा नेपाली कांग्रेस रामेछापका पूर्व पार्टी सभापति रामचन्द्र खड्का, महाधिवेशन प्रतिनिधिहरू युवराज भट्टराई, झपडराज भण्डारी, जितेन्द्र मोक्तान, जिल्ला कार्यसमिति उपसभापति नवराज थोकर, सचिव विनोद कार्की, नेता नारायण बोगटी र निर्माण माझीको सहभागिता रहेको थियो।
समाजसेवी भरत प्रसाद चौलागाईंले विद्यार्थीका समस्या नजिकबाट बुझेको उल्लेख गर्दै आगामी दिनमा पनि सकेको सहयोग निरन्तर गर्ने प्रतिबद्धता व्यक्त गरे।
अप्ठ्यारोमा साथ दिने हात र जाडोमा न्यानो दिने मन—भरत प्रसाद चौलागाईं आज रामेछापमा केवल राजनीतिक नेतामात्र होइनन्, मानवीय सेवाको एउटा भरोसिलो नाम बनेका छन्।
