काठमाडौँ: नेपाल सरकारले गत मार्चमा गएको शक्तिशाली भूकम्पबाट क्षतिग्रस्त म्यान्मारका दुई धार्मिक सम्पदास्थलको पुनर्निर्माणका लागि म्यान्मार सरकारलाई तीन लाख ५० हजार अमेरिकी डलर आर्थिक सहयोग प्रदान गरेको छ।
म्यान्मारका लागि नेपालका राजदूत हरिश्चन्द्र घिमिरेले म्यान्मारको मण्डले सहरको दक्षिण–पश्चिम क्षेत्रमा अवस्थित महामुनी पगोडा परिसरमा आयोजित एक समारोहमा पगोडाका महासचिव थान उलाई तीन लाख अमेरिकी डलरको चेक हस्तान्तरण गरे। उक्त जानकारी नेपालको राजदूतावास, याङ्गुनले दिएको छ।
यसैगरी, उहाँले गङ्गाघाट हिन्दू मन्दिरको पुनर्निर्माणका लागि ५० हजार अमेरिकी डलरको चेक उक्त मन्दिरका अध्यक्ष पवन बजोरियालाई हस्तान्तरण गरेकाछन्।
गङ्गाघाट हिन्दू मन्दिर म्यान्मारमा बसोबास गर्ने नेपाली समुदायका लागि महत्वपूर्ण धार्मिकस्थलका रूपमा परिचित छ।
साझा धार्मिक सम्पदाको संरक्षण तथा प्राकृतिक विपत्तिबाट प्रभावित सांस्कृतिक महत्वका स्थलहरूको पुनःस्थापनामा सहयोग गर्ने नेपाल सरकारको प्रतिबद्धता यस सहयोगले स्पष्ट रूपमा झल्काएको दूतावासले जारी गरेको विज्ञप्तिमा उल्लेख गरिएको छ।
