काठमाडौँ: भदौ २३ र २४ गते घटेको घटनाबारे सत्यतथ्य पत्ता लगाउन गठन गरिएको उच्चस्तरीय जाँचबुझ आयोगले आज प्रधानमन्त्री सुशीला कार्कीलाई आफ्नो विस्तृत प्रतिवेदन बुझाएको छ।
पूर्वन्यायाधीश गौरीबहादुर कार्कीको संयोजकत्वमा गठित उक्त आयोगले करिब एक हजार पृष्ठ लामो प्रतिवेदन तयार गरी सरकारलाई हस्तान्तरण गरेको हो। प्रतिवेदनमा घटनाको पृष्ठभूमि, दोषीको पहिचान तथा आगामी दिनमा सुधार गर्नुपर्ने विषयहरू समेटिएका छन्। आयोगमा नेपाल प्रहरीका पूर्वअतिरिक्त महानिरीक्षक विज्ञानराज शर्मा र कानुनविद् विश्वेश्वरप्रसाद भण्डारी सदस्यका रूपमा रहेका थिए।
प्रतिवेदन बुझाएपछि आयोगका सदस्य शर्माले करिब २०० जनासँग सोधपुछ तथा विज्ञहरूको सुझावका आधारमा दोषीहरूमाथि कारबाही गर्न सिफारिस गरिएको जानकारी दिए। प्रतिवेदनले घटनाको विस्तृत विश्लेषण गर्दै भविष्यमा यस्ता घटना दोहोरिन नदिन आवश्यक नीति तथा सुधारका सुझावहरू पनि प्रस्तुत गरेको छ।
प्रतिवेदन ग्रहण गर्दै प्रधानमन्त्री कार्कीले त्यसको अध्ययन गरी दोषीलाई कानुनी दायरामा ल्याउने र आयोगले दिएका सिफारिसहरू कार्यान्वयन गर्ने प्रतिबद्धता व्यक्त गरिन्।
