श्री प्रगतिशील माध्यमिक बिधालयको हीरक महोत्सव सम्पन्न

श्री प्रगतिशील माध्यमिक विद्यालयको हीरक महोत्सव भव्य रूपमा सम्पन्न भएको छ। व्यवस्थापन समितिका अध्यक्ष टेक बहादुर श्रेष्ठको अध्यक्षतामा सम्पन्न कार्यक्रममा पालिका अध्यक्ष ज्ञानकुमार श्रेष्ठ प्रमुख अतिथिका रूपमा सहभागी हुनुभएको थियो।
कार्यक्रममा पालिका उपाध्यक्ष, जिल्ला शिक्षा समन्वय इकाइ प्रमुख लगायतका विशिष्ट व्यक्तित्वहरूको उपस्थिति रहेको थियो। साथै विद्यार्थी, अभिभावक, पूर्व विद्यार्थी, पूर्व शिक्षक तथा समाजसेवीहरूको उल्लेखनीय सहभागिता देखिएको थियो।
महोत्सवको अवसरमा विद्यालयमा महत्वपूर्ण योगदान पुर्‍याउने पूर्व विद्यार्थी, पूर्व शिक्षक, समाजसेवी तथा विभिन्न सहयोगदाताहरूलाई सम्मान गरिएको थियो। यसै क्रममा विद्यालयको स्मारिका समेत विमोचन गरिएको छ।
कार्यक्रमलाई सम्बोधन गर्दै प्रमुख अतिथि तथा पालिका अध्यक्ष ज्ञानकुमार श्रेष्ठले विद्यालयलाई अझ उत्कृष्ट बनाउने अभियानमा यस्ता कार्यक्रमले प्रेरणा प्रदान गर्ने विश्वास व्यक्त गर्नुभयो। उहाँले शिक्षकहरूलाई जिम्मेवार र प्रतिबद्ध भएर शैक्षिक गुणस्तर सुधारतर्फ लाग्न आग्रह गर्नुभयो।
उहाँले स्थानीय सरकारले शिक्षा क्षेत्रको विकासका लागि आवश्यक सहयोग गर्ने प्रतिबद्धता समेत व्यक्त गर्नुभयो।
हीरक महोत्सवले विद्यालयको विगतलाई स्मरण गर्दै भविष्यतर्फ अग्रसर हुने सन्देश दिएको छ।