काठमाडौँ: गृहमन्त्री सुधन गुरुङले जेनजी आन्दोलनका घाइतेहरूलाई भेटेका छन्। उनी बिहीबार राति करिब १० बजे केएमसी अस्पताल पुगेर उपचाररत घाइतेहरूको अवस्थाबारे जानकारी लिएका हुन्।
अस्पतालमा पुगेर उनले चिकित्सकहरूसँग घाइतेहरूको स्वास्थ्य अवस्थाबारे बुझ्नुका साथै उपचार व्यवस्थाबारे जानकारी लिएका गृहमन्त्रीको निजी सचिवालयले जनाएको छ।
उक्त अस्पतालमा पूर्वसांसद डा. सुनिल शर्माले घाइतेहरूको निःशुल्क उपचार गर्दै आएका छन्। गृहमन्त्री गुरुङले निःशुल्क उपचार सेवा प्रदान गरेकोमा डा. शर्माप्रति आभार व्यक्त गरेका छन्।
भेटका क्रममा डा. शर्माले अधिकांश घाइतेहरू डिस्चार्ज भइसकेको र केहीको अवस्था अझै गम्भीर रहेकाले अस्पतालमै निःशुल्क उपचार भइरहेको जानकारी दिए।
गृहमन्त्री गुरुङले घाइतेहरूको उपचारमा देखाएको मानवीय सेवाको प्रशंसा गर्दै भने, “तपाईंले घाइतेहरू मात्र होइन, उहाँहरूको परिवारको आँसु पनि पुछिदिनुभएको छ। यस्तो सेवा निरन्तर रहोस्, तपाईंप्रति सधैं सम्मान रहनेछ।”
