काठमाडौँ: यातायात व्यवस्था विभागले सार्वजनिक यातायातको भाडा फेरि बढाएको छ। बुधबारदेखि लागू हुने गरी अन्तरप्रदेशमा सञ्चालन हुने यात्रुवाहक तथा मालवाहक सवारी साधनको नयाँ भाडादर लागू गरिएको विभागले जनाएको छ।
विभागका अनुसार अन्तरप्रदेश यात्रुवाहक सवारी, पहाडी क्षेत्रमा सञ्चालन हुने मालवाहक तथा तराई मार्गमा चल्ने मालवाहक सवारीको भाडा समान रूपमा ५ प्रतिशतले वृद्धि गरिएको छ।
यसअघि पनि गत चैत २५ गते सार्वजनिक यातायातको भाडा समायोजन गरिएको थियो। भौतिक पूर्वाधार तथा यातायात मन्त्रालयले वैशाख १२ गते दिएको सहमतिपछि नयाँ भाडादर कार्यान्वयनमा ल्याइएको विभागले जनाएको छ।
विभागले हाल डिजेलको मूल्य प्रतिलिटर २३५ रुपैयाँ ८३ पैसा पुगेको उल्लेख गर्दै विद्युतीय सवारी साधनलाई भने भाडा वृद्धि गर्न अनुमति नदिइएको स्पष्ट पारेको छ। विद्युतीय सवारीले मनोमानी रूपमा भाडा बढाएको पाइए कानुनी कारबाही गरिने चेतावनी पनि विभागले दिएको छ।
२०७८ चैत ३१ गतेको मन्त्रिपरिषद् निर्णयअनुसार पेट्रोलियम पदार्थको मूल्यमा ५ प्रतिशत वा सोभन्दा बढी उतारचढाव भए सार्वजनिक यातायातको भाडा स्वतः समायोजन हुने व्यवस्था लागू गरिएको थियो। विभागले यही स्वचालित प्रणालीअनुसार भाडा समायोजन गरिएको जनाएको छ।
