कञ्चनपुर । भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावलले भूमिहीन सुकुमवासीलाई सरकारले लालपुर्जा उपलब्ध गराउने भन्दै ढुक्क भएर बस्न आग्रह गरेकी छन्।
आइतबार कञ्चनपुरको कृष्णपुर नगरपालिकामा भूमिहीन सुकुमवासीसँगको भेटघाटका क्रममा मन्त्री रावलले लालपुर्जा वितरणका लागि कानुनी प्रक्रिया अघि बढिसकेको बताइन्। उनका अनुसार कानुनमा आवश्यक सुधार भइसकेकाले जिल्ला भूमि समितिले प्रक्रिया अघि बढाएर सुकुमवासीलाई लालपुर्जा वितरण गर्न सक्ने अवस्था बनेको छ।
“तपाईंहरूलाई लालपुर्जा दिने बाटो खुलिसकेको छ, कानुनमा सुधार भइसकेको छ,” मन्त्री रावलले भनिन्, “अब जिल्ला भूमि समितिले छिटोभन्दा छिटो काम सुरु गरेर तपाईंहरूलाई लालपुर्जा दिन्छ।”
उनले देशभर रहेका भूमिहीन तथा सुकुमवासीको समस्या समाधान गर्न विद्यमान कानुनमा थप सुधार आवश्यक रहेको बताइन्। अहिलेको कानुनी व्यवस्थामा रहेका केही बाधा–अड्चनका कारण समस्या समाधानमा कठिनाइ भइरहेको भन्दै उनले आवश्यक संशोधनमार्फत समस्या समाधान गर्ने प्रतिबद्धता जनाइन्।
मन्त्री रावलले भूमिहीन सुकुमवासीको समस्या सरकारको प्राथमिकतामा रहेको बताउँदै उनीहरूलाई आफू बसिरहेको स्थानबाट हटाउने कुनै योजना नरहेको स्पष्ट पारिन्।
“तपाईंहरू बसिरहेको ठाउँबाट उठाउने काम सरकारले गर्दैन,” उनले भनिन्, “तपाईंहरू ढुक्क हुनुस्, सरकारले तपाईंहरूलाई लालपुर्जा दिन्छ।”
उनले सुकुमवासीलाई विभिन्न अफवाहको पछि नलाग्नसमेत आग्रह गरिन्।
मन्त्री रावलले आइतबार बिहानैदेखि कञ्चनपुरका विभिन्न स्थानीय तहमा पुगेर भूमिहीन सुकुमवासीसँग अन्तरक्रिया गरेकी थिइन्। उनले दोधारा–चाँदनी, भीमदत्त, बेदकोट, शुक्लाफाँटा र कृष्णपुर नगरपालिकाका सुकुमवासीसँग भेट गर्दै सरकारले छिट्टै लालपुर्जा वितरणको प्रक्रिया अघि बढाउने बताइन्।
यसै क्रममा मन्त्री रावलले महेन्द्रनगरस्थित निर्माणाधीन मझगाउँ विमानस्थल तथा दोधारा–चाँदनी नगरपालिकामा निर्माणाधीन सुक्खा बन्दरगाहको समेत स्थलगत अवलोकन गरेकी छन्।
