समस्या कहाँ छ आफैँबाट पहिचान गर्नुपर्छ : अध्यक्ष महत

रामेछाप । लिखु तामाकोशी गाउँपालिकाका अध्यक्ष केशव महतले स्थानीय तहले आफ्ना समस्या आफैँ पहिचान गरी समाधानतर्फ अघि बढ्नुपर्ने बताएका छन्।
जिल्ला समन्वय समिति रामेछापको वार्षिक समीक्षा तथा असल अभ्यास आदानप्रदान कार्यक्रममा मन्थलीस्थित जिल्ला समन्वय समितिको सभाहलमा बोल्दै अध्यक्ष महतले स्थानीय सरकार नागरिकसँग प्रत्यक्ष जोडिएर काम गर्नुपर्ने बताए।
उनले ठूला ठूला योजना निर्माण गर्नुभन्दा नागरिकले प्रत्यक्ष अनुभूति गर्ने सेवामा स्थानीय तहले प्राथमिकता दिनुपर्ने बताए। बाटो कालोपत्रे गर्ने ठूला योजना भन्दा बिरामी हुँदा नागरिकलाई सहज रूपमा अस्पताल पुर्‍याउन सक्ने सरकार नागरिकको चाहना हो, उनले भने।
स्थानीय तहको कामबाट राजनीतिक दल, पत्रकार, नागरिक समाज तथा आमनागरिक सबैलाई खुसी बनाउन नसकिएको भन्दै अध्यक्ष महतले यसको कारणबारे स्थानीय तहले आफैँ समीक्षा गर्नुपर्ने बताए। विडम्बना, स्थानीय तहसँग कोही खुशी छैनन्। किन यस्तो भयो भन्ने प्रश्न हामी आफैँले गर्नुपर्छ, उनले भने।
महतले नागरिकलाई उत्पादनमार्फत समृद्धि हासिल गर्न सकिन्छ भन्ने विश्वास दिलाउन नसकिएको र सामुदायिक विद्यालयमा पनि गुणस्तरीय शिक्षा प्राप्त गर्न सकिन्छ भन्ने वातावरण बनाउन नसकिएको बताए।
स्थानीय तहको आलोचना मात्र गर्नुभन्दा सबै तहका सरकार, राजनीतिक दल, नागरिक समाज र व्यक्तिहरू मिलेर समाजको समुन्नतिका लागि काम गर्नुपर्ने उनको भनाइ छ।
अहिले आर्थिक गतिविधिलाई चलायमान बनाउने मुख्य आधार स्थानीय सरकार हो। त्यसैले आरोप प्रत्यारोप मात्र होइन, स्थानीय तहले गरेका असल अभ्यासबारे पनि छलफल गर्नुपर्छ, अध्यक्ष महतले जोड दिए।
उनले स्थानीय तहले नागरिकका वास्तविक आवश्यकता पहिचान गरी योजना निर्माण र कार्यान्वयन गर्न सकेमा मात्रै सरकारप्रति नागरिकको विश्वास बढ्ने बताए।।