सुर्खेतमा लागू औषध सहित १० जना पक्राउ परेका छन् । वीरेन्द्रनगर नगरपालिका–१० सुर्खेत स्थित बुलबुले भ्यू टू होटेलबाट लागूऔषधसहित १० पक्राउ परेका हुन् ।
कर्णाली प्रदेश प्रहरी कार्यालयको लागू औषध ब्यूरो र जिल्ला प्रहरी कार्यालय सुर्खेतबाट खटिएको संयुक्त प्रहरी टोलीले शनिबार ६३० मिलिग्राम ब्राउन सुगर जस्तो देखिने खैरो धुलो पदार्थ, चार ग्राम चरेस र ३२ ग्राम गाँजाको धुलोसहित उनीहरुलाई उक्त होटेलबाट १० व्यक्तिलाई पक्राउ गरेको हो ।
होटेलको कोठा नं २०६, २०३ र वीरेन्द्रनगर बजार एरिचोकमा लागूऔषध कारोबार भइरहेको भन्ने विशेष सूचनाका आधारमा टोली त्यहाँ पुगेको थियो । जिल्ला प्रहरी कार्यालय सुर्खेतका सूचना अधिकारी एवं प्रहरी नायब उपरीक्षक रामप्रसाद घर्तीलेका अनुसार प्रहरीले चेकजाँच गर्दा लागूऔषध भेटिएपछि उनीहरुलाई पक्राउ गरिएको हो ।
पक्राउ पर्नेहरुमा वीरेन्द्रनगर नगरपालिका–१ का २५ वर्षीय युवराज ढकाल, ३ बस्ने २२ वर्षीय कमल डाँगी र ३० वर्षीय सुमन खत्री, ४ बस्ने २४ वर्षीय सुजन शर्मा र २३ वर्षीय रञ्जीत खड्का रहेको प्रहरी नायब उपरीक्षक घर्तीले बताउनुभयो ।
त्यस्तैगरी पक्राउ पर्नेमा नारायण नगरपालिका–८ दैलेखका २३ वर्षीय दीपक थापा र क्षितिज शाही, ११ बस्ने २९ वर्षीय सागर चन्द, डुङ्गेश्वर गाउँपालिका–१ दैलेखका २४ वर्षीय डम्बर खड्का र महावै गाउँपालिका–३ कालीकोटका २२ वर्षीय जीवन सिंह रहेका छन । हाल उनीहरुलाई अनुसन्धानका लागि हिरासतमा राखिएको प्रहरीले जनाएको छ ।
