ललितपुरमा एकै परिवारका चार जना मृत भेटिएका छन् । ललितपुरको कोन्ज्योसोम गाउँपालिका –४ नल्लुको एउटै घरका चार जना सुतेकै ठाउँमा मृत अवस्थामा फेला परेका हुन् भने दुई जना घाइते छन् ।
महानगरीय प्रहरी परिसर ललितपुरका प्रमुख एसएसपी यज्ञविनोद पोखरेलका अनुसार उनीहरूको निसास्सिएर मृत्यु भएको अनुमान लगाईएको छ । घटनास्थलमा फरेन्सिक डाक्टर सहितको टोली पुग्दैछ ।
मृत्यु हुनेमा ५५ वर्षीय काइँला स्याङताङ, बुहारी २२ वर्षीया सुष्मा स्याङताङ, नाति ९ वर्षीय आशिष स्याङताङ र ५ वर्षीया नातिनी आशमा स्याङताङ रहेका छन् । त्यस्तै छोरा २२ वर्षीय सुभाष स्याङताङ र नाबालक २ दिनको नवजात शिशु बेहोस् अवस्थामा भेटिएका छन् ।
उनीहरू खाना खाएर बुहारी सुष्मा सुत्केरी भएका कारण कोठामा आगो बालेर सुतेका थिए । घटनास्थलमा आगो बालेको कोइला र केही वान्ता भएको पनि देखिएको छ ।
बेहोस अबस्थामा रहेका सुभाष र दुई दिनको शिशुलाई उद्धार गरी उपचारका लागि पाटन अस्पताल ल्याइएको छ । घटना अनुसन्धानका लागि फरेन्सिक चिकित्सक सहित महानगरीय प्रहरी परिसर ललितपुर, महानगरीय प्रहरी वृत्त चापागाउँ, इलाका प्रहरी कार्यालय कोन्ज्योसोमबाट टोली खटिएको छ ।
